नवी दिल्ली, लोकशाही न्यूज नेटवर्क
तुम्ही 12 वी उत्तीर्ण असून सरकारी नोकरीच्या शोधात आहात का ? तर तुमच्यासाठी खुशखबर आहे. केंद्र सरकारच्या (Central Govt) विविध मंत्रालये, संबंधित विभाग आणि कार्यालयांमध्ये लेव्हल-2, लेव्हल-4 आणि लेव्हल-5 च्या सुमारे 4,500 पदांच्या भरतीसाठी अधिसूचना जारी करण्यात आली आहे.
मान्यताप्राप्त बोर्डातून 12वी उत्तीर्ण झालेल्या उमेदवारांसाठी ही भरती निघाली आहे. 4,500 सरकारी नोकऱ्यांमध्ये लोअर डिव्हिजन क्लर्क (LDC) /ज्यूनियर सेक्रेटरियल असिस्टंट (JSA), डेटा एंट्री ऑपरेटर (DEO) आणि डेटा एंट्री ऑपरेटर (ग्रेड A) यांचा समावेश आहे.
स्टाफ सिलेक्शन कमिशन (Staff Selection Commission) द्वारे या पदांसाठी उमेदवारांची निवड संयुक्त उच्च माध्यमिक (10+2) परीक्षा 2022 द्वारे केली जाईल. या परीक्षेची अधिसूचना आयोगाने 6 डिसेंबर 2022 रोजी प्रसिद्ध केली असून अर्ज प्रक्रिया सुरू झाली आहे.
असा करा अर्ज
इच्छुक असलेले 12वी पास उमेदवार आणि कमाल वय 27 वर्षे असलेले उमेदवार आयोगाच्या अधिकृत वेबसाइट http://ssc.nic.in वर अर्ज करू शकतात. अर्जासाठी वेबसाइटला भेट दिल्यानंतर उमेदवारांना प्रथम होमपेजवर दिलेल्या लॉगिन सेक्शनमध्ये नोंदणी करावी लागेल आणि नंतर नोंदणीकृत तपशीलांसह लॉग इन करून उमेदवार संबंधित परीक्षेसाठी अर्ज सादर करू शकतील. अर्जाची फी 100 रुपये आहे. महिला उमेदवारांनी, SC, ST, दिव्यांग आणि माजी कर्मचारी श्रेणीतील उमेदवारांनी भरावी लागणार नाही.
अशी होईल निवड?
एसएससी द्वारे सीएचएसएल परीक्षा 2022 दोन टप्प्यात घेतली जाईल – टियर 1 आणि टियर 2. टियर 1 कंप्युटर बेस्ड टेस्ट (CBT) मोडमध्ये घेतली जाईल आणि तिचा कालावधी 60 मिनिटे असेल. यामध्ये इंग्रजी भाषा, जनरल इंटेलिजन्स, क्वांटिटेटिव्ह अॅप्टिट्यूड आणि जनरल अवेअरनेस या विषयांमधून 25-25 प्रश्न विचारले जातील. प्रत्येक उत्तरासाठी 2 गुण असतील आणि प्रत्येक चुकीच्या उत्तरासाठी 0.5 गुण वजा केले जातील. टियर 1 मधील विविध श्रेणींनुसार निर्धारित किमान गुण मिळवणाऱ्या उमेदवारांना पुढील टप्पा टियर 2 साठी बोलावण्यात येईल.