खाटुश्यामजी भाविकांसाठी खुशखबर! शिर्डी–बिकानेर साप्ताहिक विशेष रेल्वे मार्चपर्यंत धावणार
श्री खाटुश्यामजी दर्शनासाठी तसेच राजस्थानकडे प्रवास करणाऱ्या भाविक आणि प्रवाशांसाठी आनंदाची बातमी आहे. वाढती प्रवासी संख्या लक्षात घेऊन मध्य रेल्वेने साईनगर शिर्डी–बिकानेर साप्ताहिक विशेष रेल्वे सेवेच्या कालावधीत वाढ करण्याचा निर्णय घेतला आहे. त्यामुळे महाराष्ट्र, मध्य प्रदेश आणि राजस्थान या तीन राज्यांतील प्रवाशांना थेट रेल्वे प्रवासाची सुविधा उपलब्ध राहणार आहे.
साईनगर शिर्डी हे साईभक्तांचे प्रमुख श्रद्धास्थान असून दर आठवड्याला हजारो भाविक येथे दर्शनासाठी येतात. त्याचबरोबर बिकानेर, जयपूरसह राजस्थानमधील विविध शहरांकडे धार्मिक, व्यावसायिक तसेच कौटुंबिक कारणांसाठी जाणाऱ्या प्रवाशांची संख्याही मोठी आहे. ही वाढती गरज लक्षात घेऊन रेल्वे प्रशासनाने हा महत्त्वाचा निर्णय घेतला आहे.
मध्य रेल्वेच्या भुसावळ विभागाकडून देण्यात आलेल्या माहितीनुसार, गाडी क्रमांक 04716 साईनगर शिर्डी–बिकानेर साप्ताहिक विशेष रेल्वे सेवा यापूर्वी फेब्रुवारी अखेरपर्यंतच चालवली जाणार होती. मात्र आता ही सेवा 1 मार्च 2026 पर्यंत सुरू ठेवण्यात येणार आहे. विशेष बाब म्हणजे या कालावधी वाढीदरम्यान रेल्वेच्या वेळापत्रकात, थांब्यांमध्ये किंवा डब्यांच्या रचनेत कोणताही बदल करण्यात आलेला नाही. त्यामुळे आधीच आरक्षण केलेल्या प्रवाशांना कोणतीही अडचण येणार नाही, तसेच नव्याने प्रवासाचे नियोजन करणाऱ्या प्रवाशांनाही मोठा दिलासा मिळणार आहे. दरम्यान, प्रवाशांनी गाडीची सद्यस्थिती, वेळापत्रक तसेच इतर तपशील जाणून घेण्यासाठी नॅशनल ट्रेन एन्क्वायरी सिस्टीम (NTES) अॅप किंवा भारतीय रेल्वेच्या अधिकृत संकेतस्थळाचा वापर करावा, असे आवाहन रेल्वे प्रशासनाकडून करण्यात आले आहे.
