अवैध दारू अड्ड्यावर गोळीबार; दोन कामगार गंभीर जखमी
जळगाव प्रतिनिधी शहरातील एमआयडीसी परिसरात अवैध दारू विक्रेत्याने कंपनीतील दोन कामगारांवर गावठी पिस्तुलातून गोळीबार केल्याची धक्कादायक घटना रविवारी, दि. २ नोव्हेंबर रोजी रात्री सुमारास १०.१५ वाजता घडली. या घटनेत राजन शेख रफिउल्ला (वय २०) आणि अहमद फिरोज शेख (वय २६) हे गंभीर जखमी झाले असून, दोघांवर जिल्हा शासकीय रुग्णालयात उपचार सुरू आहेत.
मिळालेल्या माहितीनुसार, एमआयडीसीतील ‘विजेता इंडस्ट्रीज’ या कंपनीतील कामगार सरफु शेख हा नाईट ड्युटीसाठी कंपनीत जात असताना रस्त्यातील एका टपरीवर थांबला. त्या ठिकाणी अवैध दारू विक्री करणारा एक व्यक्ती एखाद्याला मारहाण करीत होता. सरफुने हा प्रकार पाहिल्याचे लक्षात येताच, त्या दारू विक्रेत्याने त्यालाही मारहाण करण्याचा प्रयत्न केला. या घटनेनंतर सरफु शेखने आपल्या सहकाऱ्यांना राजन आणि अहमद शेख यांना घेऊन स्पष्टीकरणासाठी बाहेर येताच, दारू विक्रेत्याने त्यांच्याशी वाद घालून शिवीगाळ केली.
तेव्हाच तेथे उपस्थित असलेल्या एका महिलेने त्या आरोपीकडे गावठी पिस्तुल दिले, त्याने सलग चार ते पाच फायर करत तिघांवर गोळीबार केला. या गोळीबारात राजन आणि अहमद हे गंभीर जखमी झाले असून, त्यापैकी एकाची प्रकृती चिंताजनक असल्याचे सांगितले जात आहे.
घटनेची माहिती मिळताच एमआयडीसी पोलिसांनी घटनास्थळी धाव घेत तपास सुरू केला असून, आरोपींच्या शोधासाठी पोलिस पथक रवाना झाले आहे. या गोळीबारामुळे परिसरात भीतीचे वातावरण निर्माण झाले आहे.
