मुंबई, लोकशाही न्यूज नेटवर्क
तुम्ही जर सोने खरेदी करण्याच्या विचारात असाल तर तुमच्यासाठी आनंदाची बातमी आहे. सोन्याच्या किंमतीत मोठी घसरण झाली आहे. सोन्याचा दर आज म्हणजे बुधवारी प्रति 10 ग्रॅमसाठी 96 हजार 593 रुपयांवर आला आहे. तोळ्यामागे 20 दिवसात जवळपास साडेपाच हजार रुपयांची घसरण झाली आहे. ही सोन्याच्या दरातील मोठी घसरण मानली जात आहे. भारत-पाक युद्ध थांबल्यामुळे आणि अमेरिका-चीनमधील व्यापारयुद्ध टळल्यामुळे आंतरारष्ट्रीय बाजारात वेगाने घडामोडी सुरु आहेत. त्यामुळे आगामी काळात सोन्याच्या दरात बऱ्यापैकी घसरण पाहायला मिळेल, असा तज्ज्ञांचा अंदाज आहे.
जळगाव शहरातील सराफा व्यापारांनी दिलेल्या माहितीनुसार, आजचा सोन्याचा दर 93,520 रुपये म्हणजे 380.00 रुपयांची घसरण झाली आहे. तर चांदीचा दर 96,670 रुपये आहे म्हणजेच चांदीच्या दरात 40.00 रुपयांची घसरण झाली आहे.
गेल्या काही आठवड्यांपासून उच्चांकी पातळीवर असलेला सोन्याचा दर आता घसरणीच्या मार्गावर आहे. आज 24 कॅरेट सोन्याचा दर प्रति 10 ग्रॅम 96 हजार 593 रुपये इतका नोंदवण्यात आला आहे. विशेष म्हणजे, 22 एप्रिल रोजी हा दर 1 लाख 2 हजार 73 रुपयांपर्यंत होता. त्यामुळे अवघ्या तीन आठवड्यांत सोन्याच्या दरात जवळपास 5 हजार 480 रुपयांची घट झाली आहे.
भारतात लग्नसराई सुरु असल्यामुळे अनेक ग्राहक ही घसरण खरेदीसाठी अनुकूल मानत आहेत. मुंबई, पुणे, नागपूर, कोल्हापूर यांसारख्या शहरांतील सराफा बाजारांमध्ये ग्राहकांची उपस्थिती वाढत आहे. अनेक सराफ विक्रेत्यांनी सांगितले की, मागील काही दिवसांतील मंदीतून आता बाजार सावरत असल्याचे संकेत मिळत आहेत. तज्ज्ञांच्या मते, सोनं दीर्घकालीन गुंतवणुकीचा सुरक्षित पर्याय असल्यामुळे, सध्याचा दर ही खरेदीसाठी चांगली संधी ठरू शकते.
