जळगाव, लोकशाही न्यूज नेटवर्क
गोमाता संरक्षण आणि संवर्धनासाठी सरकारने अधिक कठोर भूमिका घ्यावी, या प्रमुख मागणीसाठी येत्या सोमवार दि. 27 एप्रिल 2026 रोजी राज्यभर गो सन्मान अभियान राबविण्यात येणार आहे. मंडळस्तरापासून जिल्हास्तरापर्यंत हे अभियान व्यापक स्वरूपात आयोजित करण्यात येणार असून संबंधित शासकीय अधिकाऱ्यांना विविध मागण्यांचे निवेदन सादर केले जाणार आहे.
या अभियानामागे गोसंवर्धनाबाबत जनजागृती करणे आणि शासनाचे लक्ष वेधणे हा मुख्य उद्देश आहे. कार्यकर्त्यांकडून गायीला राष्ट्रमाता तसेच राष्ट्रीय देवतेचा दर्जा देण्याची मागणी करण्यात येणार आहे. त्याचबरोबर गोसेवेसाठी स्वतंत्र केंद्रीय कायदा करण्यात यावा, अशीही भूमिका मांडण्यात येणार आहे. देशभरात गोहत्येवर पूर्णतः बंदी घालण्यात यावी, ही या आंदोलनातील एक महत्त्वाची मागणी आहे. तसेच कृषी विद्यापीठांमध्ये शेण व गोमूत्र यावर संशोधनासाठी विशेष केंद्रे स्थापन करावीत, जेणेकरून पर्यावरणपूरक आणि पारंपरिक शेती पद्धतींना चालना मिळू शकेल, असेही निवेदनात नमूद केले जाणार आहे. याशिवाय गायीच्या दुधाला तसेच गोमूत्राला प्रोत्साहनपर अनुदान देण्यात यावे, यामुळे शेतकऱ्यांना आर्थिक आधार मिळेल आणि गोपालन व्यवसायाला चालना मिळेल, असा यामागील उद्देश आहे. या अभियानात विविध सामाजिक व धार्मिक संघटनांच्या सहभाग असून नागरिकांनी मोठ्या संख्येने उपस्थित रहावे असे आवाहन करण्यात आले आहे.
