लोकशाही न्यूज नेटवर्क
तरुणाच्या जाचाला कंटाळून जालनामध्ये महाविद्यालयीन विद्यार्थिनीने आत्महत्या केल्याची धक्कादायक घटना घडली आहे. जालना जिल्ह्यातील अंबड येथे ही घटना घडली. अकरावीमध्ये शिकणाऱ्या तरुणीने आज सकाळी ब्लॅकमेलिंगला कंटाळून टोकाचे पाऊल उचलले. राहत्या घरी गळफास घेऊन तिने आत्महत्या केली. या प्रकरणाचा तपास जालना पोलिसांकडून सुरू आहे.
मिळालेल्या माहितीनुसार, जालना जिल्ह्यातील अंबडमध्ये तरुणाच्या छेडछाडीला आणि धमक्यांना कंटाळून एका महाविद्यालयीन विद्यार्थिनीने गळफास लावून आत्महत्या केली. अकरावीमध्ये शिकणाऱ्या तरुणीने आज सकाळी साडेआठ वाजताच्या सुमारास राहत्या घरात गळफास घेऊन जीवन संपवलं. तिच्या मृत्यूमुळे कुटुंबीयांना मोठा धक्का बसला.
आरोपी तरुणाकडून रस्त्यावर सतत आडवून होत असलेली छेडछाड तसेच धमक्यामुळे या तरुणीने ३ डिसेंबर रोजी पोलिस ठाण्यात धाव घेत तक्रार दिली होती. या तक्रारीवरून पोलिसांनी आरोपीला अटक देखील केली होती. मात्र तरुणीचे काही फोटो आरोपीने सोशल मीडियावर व्हायरल करण्याची धमकी दिली होती.
सततच्या धमक्या आणि छेडछाडीला कंटाळून तरुणीने टोकाचे पाऊल उचलत गळफास लावून आत्महत्या केली असल्याचे सांगितले जात आहे. दरम्यान या प्रकरणात मोठे रॅकेट असून अनेक मुलींना अशाप्रकारे त्रास होत असल्याचा आरोप आत्महत्या केलेल्या मुलीच्या आजोबांनी केला आहे. या घटनेमुळे जालन्यामध्ये खळबळ उडाली आहे.
