संभाजीनगरात बंद घर फोडून ६७ हजारांचा ऐवज लांबवला
जळगाव – शहरातील संभाजीनगर परिसरात बंद घर फोडून सोन्या–चांदीच्या दागिन्यांसह एकूण ६७ हजार रुपये किमतीचा ऐवज अज्ञात चोरट्यांनी चोरून नेल्याची घटना सोमवारी २४ नोव्हेंबर रोजी सकाळी अकराच्या सुमारास उघडकीस आली. दुपारी चार वाजता रामानंद नगर पोलीस ठाण्यात या प्रकरणी अज्ञात आरोपीविरोधात गुन्हा दाखल करण्यात आला आहे.
मिळालेल्या माहितीनुसार, विलास दत्तात्रय सैतवाल (५६, रा. संभाजीनगर, जळगाव) हे काही कारणास्तव घराबाहेर गेले असताना चोरट्यांनी घराचा कडीकोयंडा तोडून आत प्रवेश केला. घरात कोणी नसल्याची संधी साधत चोरट्यांनी सोन्या–चांदीचे दागिने चोरून नेले. घरात चोरी झाल्याचे लक्षात येताच सैतवाल यांनी तत्काळ रामानंद नगर पोलीस ठाण्यात धाव घेत तक्रार नोंदवली.
तक्रारीवरून चोरीचा गुन्हा दाखल करण्यात आला असून पुढील तपास पोलीस हवालदार जितेंद्र राठोड करत आहेत.
