घरगुती गॅस सिलिंडरचा काळाबाजर ; ६१ सिलेंडर जप्त
शनिपेठ पोलिसांची करवाई
जळगाव (प्रतिनिधी) : शहरातील आसोदा रोडवरील मोहन टॉकीज परिसरात घरगुती गॅस सिलेंडरचा अवैध काळाबाजार सुरू असल्याची माहिती मिळताच शनिपेठ पोलिसांनी कारवाई करत ६१ गॅस सिलेंडर जप्त केले आहेत. ही कारवाई मंगळवारी, १७ जून रोजी दुपारी दीड वाजेच्या सुमारास करण्यात आली असून तीन जणांविरोधात गुन्हा दाखल करण्याचे काम सुरु होते.
शनीपेठ पोलीस ठाण्याच्या पोलीस निरीक्षक कावेरी कमलाकर यांना मिळालेल्या गुप्त माहितीच्या आधारे ही कारवाई करण्यात आली. पोलिसांनी मोहन टॉकीज परिसरात छापा टाकत ३३ घरगुती व २८ व्यावसायिक गॅस सिलेंडर असा एकूण ६१ सिलेंडरचा साठा हस्तगत केला. याशिवाय गॅस भरण्यासाठी वापरण्यात येणारा वजन काटा, वाहन व अन्य साहित्य देखील जप्त करण्यात आले.
याप्रकरणी राहुल नारायण सोनवणे (वय २९), राकेश नारायण सोनवणे (वय २५, दोघे रा. पिवळ्या भिंती, मोहन टॉकीज परिसर) आणि आदेश राजू पाटील (वय २३, रा. मोहन टॉकीज परिसर) या तिघांविरोधात शनिपेठ पोलीस ठाण्यात गुन्हा दाखल करण्याची प्रक्रिया सुरू असून पुढील तपास पोलीस करत आहेत.
ही कारवाई पो.नि. कावेरी कमलाकर यांच्या मार्गदर्शनाखाली पोहेकॉ शशिकांत पाटील, प्रदीप नन्नवरे, कमलेश पाटील, गजानन वाघ, विकी इंगळे, योगेश साबळे, अमोल वंजारी, निलेश घुगे, नवजीत चौधरी आणि पराग दुसाने यांनी केली.
