पालघर, लोकशाही न्यूज नेटवर्क
महिला अत्याचारांचे प्रमाण दिवसेंदिवस वाढतच आहे. त्यातच महाराष्ट्राला हादरवणारी धक्कादायक घटना समोर आली आहे. माहीम येथील 16 वर्षीय अल्पवयीन मुलीवर 11 जणांनी सामूहिक बलात्कार केल्याची घटना घडली आहे. याप्रकरणी सातपाटी सागरी पोलिसांनी पाच तरुणांना अटक केली असून अन्य सहा तरुणांचा शोध सुरु आहे.
पीडितेने फिर्यादी दिलेल्या माहितीनुसार, पीडित 16 वर्षीय मुलगी माहीम येथे राहते. 16 डिसेंबर रोजी आरोपी अल्पवयीन मुलीला माहीम गावातील एका निर्जन बंगल्यावर घेऊन गेले. रात्री 8 वाजता बंगल्यावर गेल्यानंतर आरोपींनी तिच्यावर बलात्कार केला. बंगल्यावर अत्याचार केल्यानंतर आरोपी पीडित मुलीला माहीम बीचवर घेऊन गेले. त्यानंतर तिथेही आरोपींनी अल्पवयीन मुलीवर अत्याचार केले. दरम्यान त्या मुलीने माहीम पोलिस चौकी गाठत या तरुणांविरुद्ध तक्रार दाखल केली.
त्यानंतर सातपाटी सागरी पोलीस ठाण्यात सामूहिक बलात्कार प्रकरणात गुन्हा दाखल करण्यात आला. पोलिसांनी पोक्सो कायद्यासह आयपीसी 376 (ड) (सामूहिक बलात्कार), 366 (अ) (अल्पवयीन मुलीची खरेदी करणे), कलम 341, कलम 342, 323 आदी कलमान्वये गुन्हा दाखल केला आहे. यांनतर पोलिसांनी तातडीने तपास सुरू केला. याप्रकरणात पोलिसांनी 5 आरोपींना अटक केली असून, 6 आरोपी फरार आहेत. 6 आरोपींचा शोध पोलिसांकडून सुरू आहे. अशी माहिती पालघरचे पोलीस अधीक्षक बाळासाहेब पाटील यांनी दिली.