लोकशाही न्यूज नेटवर्क
रोटरी क्लब जळगाव आणि गांधी रिसर्च फाउंडेशन, जळगाव यांच्या संयुक्त विद्यमाने गुरुवारी (दि. ६) चोपडा तालुक्यातील धानोरा येथील सूर्यवंशी गुजर समाज सतपंथ मंदिरात भव्य मोफत आरोग्य तपासणी शिबिराचे आयोजन करण्यात आले. शिबिरास परिसरातील नागरिकांनी उत्स्फूर्त प्रतिसाद दिला असून एकूण ४५३ महिला व पुरुषांनी विविध आरोग्य सेवांचा लाभ घेतला.
या शिबिरात महिलांसाठी व किशोरवयीन मुलींसाठी मोफत हिमोग्लोबिन तपासणी, औषध वाटप आणि आरोग्य समुपदेशन करण्यात आले. तसेच सर्वांसाठी मोफत दंत तपासणी व नेत्र तपासणीची सुविधा उपलब्ध करून देण्यात आली. गरजू रुग्णांसाठी मोफत मोतीबिंदू शस्त्रक्रियेसाठीही विशेष व्यवस्था करण्यात आली.
शिबिराच्या उद्घाटनप्रसंगी रोटरी क्लब जळगावचे अध्यक्ष ॲड. हेमंत भंगाळे, मानद सचिव स्वाती ढाके, डॉ. पराग जहागीरदार, डॉ. तुषार फिरके, डॉ. काजल फिरके, रोटे. संदीप शर्मा, डॉ. माधुरी कासट, डॉ. हर्षदा पाटील, डॉ. ज्योती चौधरी, डॉ. पवन बजाज आणि डॉ. हर्षवर्धन जोशी उपस्थित होते.
यावेळी विजय जोशी, योगेश गांधी, सुबोध सराफ, राकेश चव्हाण, सुनील नानकर, सतपंथ मंदिर सेवा समितीचे विजय महाराज, गजानन चौधरी, सुरेंद्र महाजन, अध्यक्ष प्रदीप महाजन तसेच वासुदेव महाजन यांचीही प्रमुख उपस्थिती होती. शिबिराच्या पूर्वतयारी व आयोजनासाठी गांधी रिसर्च फाउंडेशनचे गिरीश कुलकर्णी, सुधीर पाटील, प्रशांत सूर्यवंशी, चंद्रकांत चौधरी आणि विक्रम अस्वार यांनी मोलाचे सहकार्य केले.
धानोरा, पंचक, मोहरद, पारगाव, चिंचोली, देवगाव, खोरगाव, अडावद आदी गावांतील नागरिकांनी मोठ्या संख्येने शिबिराचा लाभ घेतला. गावकऱ्यांनी अशा प्रकारची आरोग्य शिबिरे नियमितपणे आयोजित करण्याची अपेक्षा व्यक्त केली. शिबिराच्या यशस्वी आयोजनासाठी रोटरी क्लब जळगाव, गांधी रिसर्च फाउंडेशन आणि सतपंथ मंदिर सेवा समितीच्या पदाधिकाऱ्यांनी विशेष परिश्रम घेतले.
