सावदा, लोकशाही न्यूज नेटवर्क
रावेर तालुक्यातील वाघोदा बुद्रुक येथे घरांसमोर ठेवलेल्या वेगवेगळ्या कंपन्यांच्या पाण्याच्या चार मोटारी अज्ञात चोरट्याने लांबवल्याची घटना उघडकीस आली आहे. या प्रकरणी सावदा पोलीस ठाण्यात अज्ञात आरोपीविरुद्ध चोरीचा गुन्हा नोंदवण्यात आला आहे.
पोलीस सूत्रांकडून मिळालेल्या सविस्तर माहितीनुसार, वाघोदा बुद्रुक (ता. रावेर, जि. जळगाव) येथील रहिवासी परशुराम अशोक भोसले (वय 35, व्यवसाय- पंक्चर दुकान व पोलीस पाटील) यांच्या घरासमोरून ही चोरी झाली. 31 जुलै 2026 रोजी रात्री 11 ते 1 ऑगस्ट 2026 रोजी सकाळी साडेसहा वाजेच्या दरम्यान अज्ञात चोरट्याने परिसरातील नागरिकांच्या आणि फिर्यादीच्या मालकीच्या पाण्याच्या मोटारी लांबवल्या.
चोरीस गेलेल्या मुद्देमालामध्ये 4 हजार 500 रुपये किमतीची एक, 2 हजार रुपये किमतीची दुसरी, 3 हजार रुपये किमतीची 1 एचपी क्षमतेची हिरव्या रंगाची तिसरी आणि 4 हजार रुपये किमतीची अर्धा एचपी क्षमतेची चौथी अशा ‘टेक्समो’ कंपनीच्या एकूण चार पाण्याच्या मोटारींचा समावेश आहे. या सर्व मोटारींची एकूण किंमत सुमारे 13 हजार 500 रुपये आहे.
आपल्या मालकीच्या पाण्याच्या मोटारी चोरीला गेल्याचे लक्षात आल्यानंतर परशुराम भोसले यांनी सावदा पोलीस ठाण्यात धाव घेतली. त्यांनी दिलेल्या फिर्यादीवरून 1 ऑगस्ट 2026 रोजी रात्री 9.17 वाजता सावदा पोलिसांत गुन्हा रजिस्टर क्रमांक 195/2026 नुसार भारतीय न्याय संहितामधील कलम 303(2) अन्वये गुन्हा दाखल करण्यात आला आहे. या प्रकरणात ई-साक्ष प्रणालीचा वापर करण्यात आला आहे. घटनेची माहिती मिळताच सहाय्यक पोलीस निरीक्षक गणेश फड यांनी घटनास्थळी भेट देऊन पाहणी केली. या चोरीच्या गुन्ह्याचा पुढील तपास पोलीस हवालदार विनोद नबू तडवी करत आहेत.
