अमळनेर
तालुक्यातील टाकरखेडा येथे एकाच कुटुंबातील पती-पत्नी आणि त्यांच्या दोन मुलांचा रेल्वे मार्गावर मृत्यू झाल्याची दुर्दैवी घटना २७ ऑगस्ट रोजी पहाटे ४ ते ५ वाजेच्या सुमारास घडली. या घटनेने टाकरखेडा गावासह परिसरात हळहळ व्यक्त होत आहे.
मिळालेल्या माहितीनुसार, टाकरखेडा येथील सुनील अमृत भिल, त्यांची पत्नी पार्वती सुनील भिल आणि त्यांची दोन मुले सनी व राज हे पहाटेच्या सुमारास घरातून बाहेर पडले होते. त्यानंतर चौघांचा रेल्वे मार्गावर मृत्यू झाल्याची माहिती समोर आली.
पहाटे सुमारे ४.४० वाजता रेल्वे अधिकाऱ्यांनी याबाबत पोलिसांना माहिती दिली. घटनेची माहिती मिळताच पोलीस निरीक्षक दत्तात्रय निकम यांच्या मार्गदर्शनाखाली एपीआय गणेश अहिरे, हेडकॉन्स्टेबल संदेश पाटील, विजय भोई, योगेश बागुल आणि राहुल पाटील यांनी घटनास्थळी जाऊन पंचनामा करण्याची कार्यवाही केली.
या घटनेमागील नेमके कारण अद्याप स्पष्ट झालेले नाही. कौटुंबिक कारणातून ही घटना घडल्याची चर्चा परिसरात सुरू असली, तरी अधिकृत कारण तपासानंतरच स्पष्ट होणार आहे.
एकाच कुटुंबातील चौघांचा मृत्यू झाल्याने टाकरखेडा गावावर शोककळा पसरली असून ग्रामस्थांकडून हळहळ व्यक्त केली जात आहे. पोलिसांकडून घटनेचा पुढील तपास सुरू आहे.
