लोकशाही न्यूज नेटवर्क
वाराणसीच्या लाल बहादुर शास्त्री आंतरराष्ट्रीय विमानतळावर गोळीबार झाल्याची घटना घडली आहे. या घटनेत विमानतळावरील दोन कर्मचारी जखमी झाले. जखमींमध्ये एका महिला कर्मचाऱ्याचाही समावेश आहे. दोघांवर हरहुआ येथील खासगी रुग्णालयात उपचार सुरू असून त्यांची प्रकृती स्थिर असल्याचे सांगण्यात आले.
मिळालेल्या माहितीनुसार, आजमगडचा एक प्रवासी एअर इंडियाच्या विमानाने मुंबईला जाणार होता. विमानतळावरील सुरक्षा प्रक्रियेदरम्यान त्याने आपल्याकडील पिस्तुल आणि मॅगझिनची माहिती अधिकाऱ्यांना आधीच दिली होती. त्यानंतर शस्त्र आणि संबंधित कागदपत्रांची तपासणी सुरू होती. याच तपासणीदरम्यान अचानक पिस्तुलातून गोळी सुटली.
गोळी जमिनीवर आदळल्यानंतर जवळ उभ्या असलेल्या एका तरुणाच्या हाताला आणि एका महिलेच्या मांडीला लागली. या घटनेनंतर विमानतळ परिसरात काही काळ गोंधळाचे वातावरण निर्माण झाले. वाराणसी विमानतळाचे संचालक पुनीत गुप्ता यांनी सांगितले की, शस्त्र आणि त्याच्या कागदपत्रांची तपासणी सुरू असताना ही घटना घडली. त्यावेळी प्रवासी आणि विमानतळ कर्मचारी दोघेही तेथे उपस्थित होते.
जखमी महिला आणि पुरुष कर्मचाऱ्यांची प्रकृती सामान्य असून त्यांच्यावर उपचार सुरू आहेत. घटनेनंतर विमानतळ प्रशासन आणि सुरक्षा यंत्रणांकडून या प्रकरणाची चौकशी सुरू करण्यात आली आहे. गोळी नेमकी कोणत्या कारणाने सुटली, याची माहिती तपासातून स्पष्ट होणार आहे.
