लोकशाही न्यूज नेटवर्क
देशात सध्या खासदार फोडण्याचे वारे वाहत आहेत. ममता बॅनर्जी यांच्या पक्षाचे खासदार फोडल्यानंतर आता उद्धव ठाकरे यांच्या शिवसेनेचे खासदार फोडण्यात आले आहेत. आता काँग्रेस, शरद पवार यांची राष्ट्रवादी आणि समाजवादी पार्टीचे खासदारही फोडले जाणार आहेत. डीलिमिटेशन आणि नारीशक्ती विधेयक मंजूर करण्यासाठी देशभरात खासदार फोडण्याचे काम सुरू असल्याचं सांगितलं जात आहे. मात्र, ही थिअरी खासदार संजय राऊत यांनी फेटाळून लावली आहे. संजय राऊत यांनी नवा गौप्यस्फोट केल्याने एकच खळबळ उडाली आहे. मीडियाशी संवाद साधताना राऊत यांनी आज मोठा बॉम्ब टाकला आहे.
नारी शक्ती विधेयक आणि डीलिमिटेशन विधेयक मंजूर करण्यासाठी खासदारांची फोडाफोडी सुरू आहे, हे विश्लेषण चुकीचं आहे. नंबर गेमसाठी आम्ही आमच्या पक्षाचा बळी द्यायचा का? आमच्या प्रादेशिक अस्मितेचा बळी द्यायचा का? उद्या अमित शाह उद्या नसतील. ते काही संजीवनी बुटीका खाऊन जन्माला आले नाही ना. ते काय अमर आहेत का? असा सवाल संजय राऊत यांनी केला.
भाजपला घाबरलेली आहे. 2029 मध्ये काँग्रेससोबत त्यांना प्रादेशिक पक्ष राहू नये असं वाटतं. 850 खासदारांचा आकडा घेऊन भाजप संविधानात बदल करणार आहे. संविधान बदलल्यावर भाजपला देशातील लोकशाही खतम करायची आहे आणि त्यांना या देशात हुकूमशाही आणायची आहे. अध्यक्षीय पद्धत आणायची आहे. तानाशाही आणायची आहे. पण आम्ही ते होऊ देणार नाही, असा गौप्यस्फोटच राऊत यांनी केला आहे.
राहुल गांधी देशाचे नेते आहेत. लोकप्रिय नेता आहेत. ते संघर्ष करत आहे. आज अशाच संघर्षाची गरज आहे. राहुल गांधींच्या लीडरशीपनेच मोदींना आव्हान उभं केलं आहे. 2029मध्ये आम्ही राहुल गांधींच्या नेतृत्वात सरकार बनवणार आहोत. हे मोदी आणि शाह यांना माहीत आहे. त्यामुळेच ते प्रादेशिक पक्ष तोडत आहे. आम्ही 2029 मध्ये केंद्रात सरकार बनवतोय हे मोदी आणि शाहांना माहीत आहे. त्यामुळेच आज देश राहुल गांधींना वाढदिवसाच्या शुभेच्छा देत आहे, असं त्यांनी सांगितलं.
शरद पवार गटाचे खासदारही फोडले जाणार असल्याची चर्चा आहे. त्यावरही त्यांनी भाष्य केलं. हेच काम आहे ना दिल्लीवाल्यांचं? मी सांगितलं ना काल मोदी आणि ट्रम्प यांची बैठक झाली. शिंदे तुमचे खासदार फोडणार आहे, सरकार सांभाळा असं मोदी ट्रम्पला सांगत आहेत, असा चिमटाही त्यांनी काढला.
