धानोरा, लोकशाही न्यूज नेटवर्क
मोहरद येथील तरुण शेतकऱ्याने कर्जबाजारीपणाला कंटाळून गळफास घेवून आत्महत्या केली. मोहरद ता. चोपडा येथील तरुण शेतकरी अनिल शामराव पाटील (४६) असे शेतकऱ्याचे नाव आहे.
अनिल पाटील ते आई, वडील, पत्नी व मुलांसह राहत होते. त्यांचे वडील, पत्नी व लहान मुलगा धुळे येथे नातेवाईकांकडे लग्न समारंभासाठी गेले होते. अनिल यांची आई शेतात गेली होती. त्या शेतातून घरी आल्यावर अनिल हा गळफास घेतलेल्या अवस्थेत आढळून आला. यावेळी त्यांनी आरडा ओरड केल्याने ग्रामस्थांनी घटनास्थळी धाव घेतली.
याबाबत पोलीस पाटील रजिया तडवी यांनी अडावद पोलीस स्टेशनला माहीती दिली. पोलीसांनी घटनेचा पंचनामा करून मृतदेह शवविच्छेदनासाठी चोपडा उपजिल्हा रुग्णालयात पाठवला. अनिल पाटील यांच्यावर सततच्या नापिकीमुळे कर्जाचा डोंगर वाढला होता. घराची सर्व जबाबदारी त्यांच्यावर होती. त्यांच्या निधनाने आई, वडील, पत्नी व लहान मुलांवर दुःखाचा डोंगर कोसळला आहे.
