जामनेर : शहरातील सुपारी बाग परिसरात एका 22 वर्षीय तरुणाचा मृतदेह आढळून आल्याने परिसरात खळबळ उडाली आहे. रितेश उर्फ समा पन्नालाल बोरसे असे मयत तरुणाचे नाव असून तो शेतीकाम करीत होता.
मिळालेल्या माहितीनुसार, रितेश हा काल संध्याकाळपासून बेपत्ता होता. त्याचा शोध कुटुंबीय व मित्रांकडून रात्रभर सुरू होता. मात्र आज सकाळी सुमारे 10 वाजेच्या सुमारास सुपारी बाग येथील निर्जन स्थळी त्याचा मृतदेह आढळून आला. घटनेची माहिती मिळताच मित्रांनी व नातेवाईकांनी घटनास्थळी धाव घेतली. त्यानंतर मृतदेह पुढील तपासणीसाठी उपविभागीय रुग्णालय, जामनेर येथे आणण्यात आला. प्राथमिक माहितीनुसार, रितेशने मद्यप्राशन केले होते. त्यामुळे उष्माघातामुळे त्याचा मृत्यू झाला असावा, असा प्राथमिक अंदाज व्यक्त करण्यात येत आहे. मात्र कुटुंबीयांनी हा घातपात असल्याचा संशय व्यक्त केला असून घटनेचा सखोल तपास करण्याची मागणी केली आहे. रितेशच्या पश्चात आई-वडील व मोठा भाऊ असा परिवार आहे. त्याचे कुणाशीही वाद नसल्याचे नातेवाईकांनी सांगितले. या प्रकरणाचा पुढील तपास पोलीस प्रशासनाकडून सुरू आहे.
