लोकशाही संपादकीय लेख
जळगाव महानगरपालिकेत भाजप आणि शिवसेना यांची थम्पिंग मेजॉरिटी असताना प्रभाग क्रमांक दोनमधील नगरसेवक आपल्या विविध मागण्यांसाठी महानगरपालिकेसमोर उपोषण आंदोलन करत आहेत. महानगरपालिका निवडणुका होऊन आठ महिने झाले. नवीन सत्ताधारी भाजप-सेनेचे म्हणजे महायुतीचे मंडळ अस्तित्वात आले; परंतु गेल्या काही महिन्यांपासून पिण्याचे पाणी, तुंबलेल्या गटारी, आरोग्याच्या असुविधा यासाठी प्रभाग क्रमांक दोनमधील कलानगर या भागातील नागरिक त्रस्त झाले आहेत.
उन्हाळ्यात रेल्वे क्रॉसिंग करून पिण्याचे पाणी आणावे लागते. पावसाळ्यात लाईटची बोंबाबोंब असल्याने जीव मुठीत धरून पाण्याला जावे लागते. कारण या ठिकाणी मोठे-मोठे सर्प असतात. ते केव्हा आणि कोणाला दंश करतील, हे सांगता येत नाही. स्वतःच्या हातातील लाईट घेऊन पाणी आणावे लागते. गटारी तुंबल्यामुळे मच्छरांचा फार मोठा त्रास येथील लोक सहन करत आहेत.
या सर्व मागण्यांसाठी या प्रभागातील नगरसेवक विजय बांदल यांनी गेल्या आठ महिन्यांत प्रशासनाला अनेक वेळा निवेदने दिली आहेत. त्याची पोचपावती त्यांनी घेतलेली आहे; पण प्रशासनाला त्याचे काही एक सोयरसुतक नाही. गेल्या आठ महिन्यांत एकाही बाबतीत आयुक्त अथवा इतर अधिकाऱ्यांनी त्यांची दखल घेतली नाही. शेवटी आपल्या प्रभागातील नागरिकांच्या सुख-सोयींसाठी विजय बांदल यांना आंदोलनाचा मार्ग अवलंबावा लागला.
महानगरपालिकेत सत्ता महायुतीची आहे. महापौर भाजपचा तर उपमहापौर शिवसेनेचा आहे; पण भाजपच्या नगरसेवकांची दखल घेतो कोण, म्हणून त्याला उपोषणासारखा मार्ग अवलंबावा लागला आहे.
