लोकशाही न्यूज नेटवर्क
कॅब किंवा ऑटो चालवताना प्रवाशांशी आता मराठीत बोलला नाही तर , लायसन्स होईल रद्द होण्याची शक्यता आहे. कारण मराठीचे व्यवहारिक ज्ञान नसलेल्या चालकांवर परवाना निलंबित किंवा रद्द करण्याची कारवाई करण्याची तरतूद करण्यात आली आहे. यासंदर्भातील शासन निर्णय आज जाहीर होणार असल्याची माहिती परिवहन मंत्री प्रताप सरनाईक यांनी दिली.
परिवहन मंत्री प्रताप सरनाईक यांनी दिलेल्या माहितीनुसार, महाराष्ट्र मोटार वाहन नियम, १९८९ मध्ये सुधारणा करून ‘antecedents’ या शब्दांनंतर “and working knowledge of Marathi language” हे शब्द समाविष्ट करण्यात आले आहेत. त्यामुळे वाहन चालवण्याच्या अधिकृततेसाठी अर्ज करताना मराठीचे व्यवहारिक ज्ञान असणे आवश्यक राहणार आहे.
नव्या नियमानुसार, एखाद्या चालकाला मराठीचे आवश्यक ज्ञान नसल्याचे आढळल्यास प्रथम त्याला एक महिन्याची मुदत देण्यात येईल. या काळात मराठी शिकण्यात सुधारणा न झाल्यास चालकाचा परवाना तीन महिन्यांसाठी निलंबित केला जाऊ शकतो. त्यानंतरही नियमांचे पालन न केल्यास परवाना कायमस्वरूपी रद्द करण्याची तरतूद करण्यात आली आहे.
मंत्री सरनाईक यांच्या म्हणण्यानुसार, व्यावसायिक वाहन चालकांसाठी मराठीची अट यापूर्वीही नियमांमध्ये होती; मात्र तिची अंमलबजावणी प्रभावीपणे होत नव्हती. प्रवाशांशी सहज आणि प्रभावी संवाद साधता यावा, विशेषतः स्थानिक प्रवाशांना सेवा देताना भाषेचा अडथळा येऊ नये, यासाठी ही अट महत्त्वाची असल्याचे त्यांनी स्पष्ट केले. परिवहन विभागाने याबाबतचा प्रस्ताव विधी व न्याय विभागाकडे पाठवला होता. मंजुरी मिळाल्यानंतर आता या निर्णयाला कायदेशीर स्वरूप मिळणार आहे.
