निवडणुका बॅलेट पेपरवर घेण्याच्या मागणीसाठी जिल्हाधिकारी कार्यालयासमोर ‘जेलभरो’
विविध संघटनांनी घोषणाबाजीसह निदर्शने करत प्रशासनाचे वेधले लक्ष
जळगाव | लोकशाही न्यूज नेटवर्क
आगामी निवडणुका बॅलेट पेपरवर घेण्याची मागणी, जातीनिहाय जनगणना, तसेच अल्पसंख्याक समाजावर होणारे अत्याचार थांबवण्यासाठी आज जिल्हाधिकारी कार्यालयासमोर भव्य ‘जेलभरो’ आंदोलन करण्यात आले.
भारत मुक्ती मोर्चा, राष्ट्रीय पिछडा ओबीसी मोर्चा, बहुजन क्रांती मोर्चा आणि राष्ट्रीय परिवर्तन मोर्चा या संघटनांनी एकत्र येऊन हे आंदोलन आयोजित केले. आंदोलकांनी घोषणाबाजीसह निदर्शने करत प्रशासनाचे लक्ष वेधले.
आंदोलनाच्या प्रमुख मागण्यांमध्ये ईव्हीएमऐवजी बॅलेट पेपरवर निवडणुका, तातडीने जातनिहाय जनगणना, तसेच अल्पसंख्याकांवरील अत्याचार थांबवून त्यांना सुरक्षा पुरविण्याचा मुद्दा अग्रस्थानी होता. यासोबतच विविध समाजघटकांच्या हितासाठी इतरही मागण्या सादर करण्यात आल्या.
आंदोलकांचे निवेदन जिल्हा प्रशासनाला देण्यात आले. आंदोलनादरम्यान काही काळ तणावाचे वातावरण निर्माण झाले असले तरी कार्यक्रम शांततेत पार पडला.
