जळगाव, लोकशाही न्यूज नेटवर्क
पारोळा तालुक्यातील शिवरे येथे ग्रामसभेदरम्यान झालेल्या वादाला हिंसक वळण लागल्याची धक्कादायक घटना समोर आली आहे. शासकीय कर्तव्य बजावत असलेले ग्रामसेवक प्रल्हाद पाटील (वय ५२) यांच्यासोबत काही ग्रामस्थांचा वाद झाला. या वेळी मारहाण झाल्यानंतर स्वतःचा जीव वाचवण्यासाठी पळत असताना पाटील यांचा दुर्दैवी मृत्यू झाला. या प्रकरणी पारोळा पोलिसांनी सात जणांविरुद्ध भारतीय न्याय संहितेच्या कलम १०५ अन्वये गुन्हा दाखल केला असून, एका संशयिताला अटक करण्यात आली आहे.
शिवरे येथे १७ ऑगस्ट रोजी ग्रामसभा आयोजित करण्यात आली होती. ग्रामसभेत गावातील विविध प्रश्नांवर चर्चा सुरू असताना जुन्या बिलांच्या कारणावरून ग्रामसेवक प्रल्हाद पाटील आणि काही ग्रामस्थांमध्ये वाद झाला. सुरुवातीला शाब्दिक स्वरूपाचा असलेला वाद पुढे वाढत गेला. यावेळी पाटील यांना शिवीगाळ करून त्यांच्यासोबत हुज्जत घालण्यात आल्याचा तसेच त्यानंतर मारहाण करण्यात आल्याचा आरोप आहे.
वाद वाढल्यानंतर सात जणांनी एकत्रितपणे पाटील यांच्याशी वाद घालत त्यांना मारहाण केल्याचे प्राथमिक तपासात समोर आले आहे. अचानक निर्माण झालेल्या या परिस्थितीत पाटील यांनी तेथून निघून जाण्याचा आणि स्वतःचा जीव वाचवण्याचा प्रयत्न केला. मात्र, धावपळीत त्यांचा दुर्दैवी मृत्यू झाला.
घटनेची माहिती मिळताच पारोळा पोलिसांनी घटनास्थळी धाव घेतली. पोलिसांनी प्रकरणाची चौकशी सुरू करून सात संशयितांविरुद्ध गुन्हा क्रमांक ३१५/२०२६ दाखल केला. त्यानंतर तपासाची चक्रे गतिमान करत एका मुख्य संशयिताला अटक करण्यात आली असून, अन्य संशयितांचा शोध सुरू आहे.
ग्रामसेवक पाटील यांचा मृत्यू नेमक्या कोणत्या परिस्थितीत झाला, मारहाणीमध्ये प्रत्येक संशयिताची भूमिका काय होती आणि जुन्या बिलांच्या मुद्द्यावरून वाद नेमका कसा वाढला, याचा तपास पोलिसांकडून केला जात आहे. प्रत्यक्षदर्शींचे जबाब, उपलब्ध पुरावे आणि घटनाक्रमाच्या आधारे पुढील कारवाई केली जाणार आहे. शासकीय कर्तव्य बजावत असलेल्या ग्रामसेवकासोबत ग्रामसभेसारख्या लोकशाही प्रक्रियेदरम्यान हिंसक प्रकार घडल्याने या घटनेचे गांभीर्य वाढले आहे. घटनेनंतर शिवरे परिसरात खळबळ उडाली असून, ग्रामस्थांमध्येही संतापाचे वातावरण आहे.
प्रल्हाद पाटील यांच्यावर पारोळा येथील धुळे रोडवरील अमरधाम येथे अंत्यसंस्कार करण्यात येत आहेत. या पार्श्वभूमीवर कोणताही अनुचित प्रकार घडू नये यासाठी परिसरात पोलिसांचा बंदोबस्त तैनात करण्यात आला आहे. कायदा व सुव्यवस्था अबाधित ठेवण्यासाठी पोलिसांकडून विशेष खबरदारी घेतली जात आहे. दरम्यान, या प्रकरणातील उर्वरित संशयितांचा शोध सुरू असून, सर्व संबंधितांची भूमिका तपासल्यानंतर पुढील कायदेशीर कारवाई केली जाणार असल्याचे पोलिसांकडून सांगण्यात आले आहे.
