लोकशाही न्यूज नेटवर्क
दिग्दर्शक आदित्य धर यांचा बहुचर्चित ‘धुरंधर २’ बॉक्स ऑफिसवर सगळे रेकॉर्ड ब्रेक करत आहे. सोशल मीडियापासून सगळीकडे या चित्रपटाची आणि त्यातील रणवीर सिंगसह प्रत्येक कलाकाराच्या कामाची चर्चा सुरु आहे. पण आता हा चित्रपट नव्या वादात सापडला आहे. मद्रास उच्च न्यायालयात या चित्रपटाविरोधात तातडीची याचिका दाखल करण्यात आली असून, तामिळनाडूमध्ये या चित्रपटाच्या प्रदर्शनावर बंदी घालण्याची मागणी करण्यात आली आहे. आगामी विधानसभा निवडणुकांच्या पार्श्वभूमीवर लागू असलेल्या आचारसंहिता नियमांचा आधार घेत ही याचिका दाखल करण्यात आली आहे.
मिळालेल्या वृत्तानुसार, याचिकाकर्त्या वकिलाने न्यायालयात असा युक्तिवाद केला की, ‘धुरंधर २’ हा चित्रपट राजकीय विषयांवर आधारित असल्याने निवडणूक काळात त्याचे प्रदर्शन मतदारांवर परिणाम करू शकते. त्यामुळे या कालावधीत चित्रपटावर बंदी घालणे आवश्यक असल्याचे त्यांनी नमूद केले.
या प्रकरणावर सुनावणीदरम्यान न्यायालयाच्या खंडपीठाने याचिकाकर्त्याला फॉर्मल रिट याचिका दाखल करण्याचे निर्देश दिले आहेत. त्यानंतरच तातडीच्या सुनावणीसाठी अर्ज करता येईल, असे न्यायालयाने स्पष्ट केले. त्यामुळे चित्रपटावर स्थगिती द्यायची की नाही, याचा अंतिम निर्णय पुढील सुनावणीनंतरच होणार आहे.
‘धुरंधर २’ हा चित्रपट १९ मार्च रोजी हिंदी, तेलुगू, तमिळ, कन्नड आणि मल्याळम या भाषांमध्ये प्रदर्शित करण्यात आला. पहिल्या पाच दिवसांत ८०० कोटींच्यावर कमाई करत ‘धुरंधर २’ ने ‘पुष्पा २’, ‘बाहुबली २’, ‘RRR’ आणि ‘KGF 2’ यांसारख्या मोठ्या ‘ब्लॉकबस्टर’ चित्रपटांनाही मागे टाकले आहे. या चित्रपटात रणवीर सिंगसह आर. माधवन, अर्जुन रामपाल, संजय दत्त, सारा अर्जुन आणि राकेश बेदी या कलाकारांनीही महत्त्वपूर्ण भूमिका साकारल्या आहेत.

