धरणगाव शहरात महास्वच्छता अभियान ; “स्वच्छोत्सव २०२५” उत्साहात पार

धरणगाव शहरात महास्वच्छता अभियान ; “स्वच्छोत्सव २०२५” उत्साहात पार

धरणगाव प्रतिनिधी स्वच्छ भारत अभियान २.० (नागरी) अंतर्गत केंद्रीय गृहनिर्माण व शहरी कार्य मंत्रालय, भारत सरकार यांच्या निर्देशानुसार देशभर “स्वच्छता पंधरवाडा” दिनांक १७ सप्टेंबर २०२५ ते २ ऑक्टोबर २०२५ या कालावधीत साजरा केला जात आहे. याच पार्श्वभूमीवर धरणगाव नगरपरिषदेतर्फे दिनांक २७ सप्टेंबर २०२५ रोजी “महास्वच्छता अभियान – स्वच्छोत्सव २०२५” चे भव्य आयोजन करण्यात आले. या अभियानाचे नेतृत्व मुख्याधिकारी रामनिवास झंवर यांच्या प्रमुख उपस्थितीत करण्यात आले.

अभियानाचे उद्दिष्ट व नियोजन

या उपक्रमाचा मुख्य उद्देश शहरात स्वच्छता राखणे, नागरिकांमध्ये स्वच्छतेविषयी जनजागृती करणे आणि सामूहिक सहभागातून शहर स्वच्छ ठेवण्याचा संदेश देणे हा होता. अभियानाअंतर्गत धरणगाव नगरपरिषदेने संपूर्ण शहरातील विविध महत्त्वाच्या ठिकाणांवर – रहिवासी व व्यापारी परिसर, सरकारी/निमसरकारी कार्यालये, शाळा, धार्मिक स्थळे, उड्डाणपूल, उद्याने, जलकुंभ, नाले, सार्वजनिक ठिकाणे, मुख्य रस्ते आदींवर प्रत्यक्ष भेटी देऊन स्वच्छता लक्ष्य ठिकाणे (Cleanliness Target Units- CTUs) निश्चित करून त्या ठिकाणची स्वच्छता करून घेतली.

नागरिक व विविध संस्थांचा उत्स्फूर्त सहभाग

स्वच्छतेचा विचार केवळ प्रशासनापुरता न ठेवता, शहरातील विविध शैक्षणिक, सामाजिक व व्यापारी संस्थांचा सहभाग या अभियानात सुनिश्चित करण्यात आला. बालकवी ठोंबरे व सारजाई दामोदर कुडे विद्यालय, इंदिरा गांधी माध्यमिक विद्यालय, आदर्श विद्यालय, पीआर हायस्कूल, महात्मा फुले हायस्कूल, अँग्लो उर्दू हायस्कूल, जिल्हा परिषद उर्दू शाळा क्रमांक १, २ व ३ आणि कला, वाणिज्य व विज्ञान महाविद्यालयातील सुमारे ६५०० विद्यार्थी या अभियानात सक्रिय सहभागी झाले.

याशिवाय शहरातील पंचमंडळे, प्रवासी मंडळ, व्यापारी संघटना, डॉक्टर्स असोसिएशन, सामाजिक संस्था यांचा देखील मोठा सहभाग लाभला. हे सर्व स्वयंसेवक नगरपरिषदेच्या अधिकाऱ्यांसोबत खांद्याला खांदा लावून काम करत होते.

स्वच्छतेचा कृतीशील उपक्रम

अभियानाची सुरुवात काही प्रमाणात कमी अस्वच्छता असलेल्या भागांपासून करण्यात आली, जेथे श्रमदानाच्या माध्यमातून तत्काळ साफसफाई करण्यात आली. त्यानंतर अधिक मोठ्या प्रमाणावर अस्वच्छता असलेल्या भागांवर लक्ष केंद्रित करण्यात आले. विविध भागांतून एकूण ८ टन कचरा गोळा करून, नगरपरिषदेच्या घंटागाडीद्वारे विल्हेवाटीकरिता पाठवण्यात आला. यामध्ये प्लास्टिक, कागद, इतर घनकचरा यांचा समावेश होता.

विद्यार्थी, शिक्षक, मुख्याध्यापक, नगरपरिषद कर्मचारी आणि नागरिकांचा सहभाग या उपक्रमात अत्यंत उल्लेखनीय ठरला.

‘स्वच्छ धरणगाव’ साकारणारी मानवी साखळी – प्रमुख आकर्षण

या उपक्रमातील एक खास आकर्षण ठरले ते बालकवी ठोंबरे शाळेच्या विद्यार्थ्यांनी साकारलेली मानवी साखळी. या विद्यार्थ्यांनी एकत्र येत “स्वच्छ धरणगाव” असे अक्षर साकारून अत्यंत प्रभावी आणि दृष्यात्मक स्वरूपात स्वच्छतेचा संदेश दिला. या अनोख्या सादरीकरणाने उपस्थितांचे विशेष लक्ष वेधून घेतले व अभियानाला अधिक प्रभावी बनवले.

समारोप व जनजागृती

या महास्वच्छता अभियानाचा समारोप आठवडे बाजार परिसरात करण्यात आला. यावेळी सर्व सहभागी स्वयंसेवकांना एकत्र करून मुख्याधिकारी रामनिवास झंवर यांनी मनोगत व्यक्त करत स्वच्छतेचे महत्त्व अधोरेखित केले.

यानंतर कला, वाणिज्य व विज्ञान महाविद्यालयाच्या विद्यार्थ्यांनी स्वच्छतेवर आधारित प्रभावी पथनाट्य सादर केले, ज्यातून जनतेमध्ये स्वच्छतेबाबत जागरूकता निर्माण झाली. पथनाट्यानंतर सर्व सहभागी विद्यार्थ्यांना खाऊ व भेटवस्तू वाटप करण्यात आले. कार्यक्रमाचा समारोप “स्वच्छता शपथ” व राष्ट्रगान घेऊन अत्यंत सन्मानपूर्वक करण्यात आला.

“स्वच्छोत्सव २०२५” हे अभियान केवळ एकदिवसीय उपक्रम न राहता, नागरिकांमध्ये स्वच्छतेबद्दल जागरूकता निर्माण करणारा आणि सामूहिक उत्तरदायित्वाची भावना वाढवणारा एक प्रेरणादायी उपक्रम ठरला. धरणगाव नगरपरिषद आणि शहरवासीयांचे समर्पण निश्चितच प्रशंसनीय असून, अशा उपक्रमांच्या माध्यमातून स्वच्छ भारताच्या दिशेने एक ठोस पाऊल टाकले गेले आहे.

या मोहिमेमध्ये स्वतः मुख्याधिकारी रामानिवास झंवर यांचेसह सर्व नगरपरिषद अधिकारी, कर्मचारी, डॉक्टर्स असोसिएशनचे अध्यक्ष डॉ. मिलिंद डहाळे, डॉ अभिजीत पाटील, व्यापारी असोसिएशन चे अध्यक्ष संजयशेठ कोठारी, मेडिकल असोसिएशनचे अध्यक्ष सुधाकर वाणी, लाडशाखीय वाणी समाजाचे पदाधिकारी विलास नाना येवले, संजय विठ्ठल वाणी, प्रशांत श्रीराम वाणी, बिपीन वाणी, तेली समाज अध्यक्ष सुनील चौधरी, कैलास चौधरी तसेच बालकवी ठोंबरे शाळेचे मुख्याध्यापक एस एस पाटील व जीवन पाटील, इंदिरा गांधी माध्यमिक विद्यालयाचे मुख्याध्यापक ए. एस पाटील, आदर्श विद्यालयाचे मुख्याध्यापक संदीपकुमार साळुंखे, पी आर हायस्कूल चे मुख्याध्यापक डी एस पाटील, डी एच कोळी, महात्मा फुले हायस्कूल चे जे एस पवार, कला वाणिज्य व विज्ञान महाविद्यालयाच्या कविता महाजन यांचेसह अँग्लो उर्दू हायस्कूल, जिल्हा परिषद उर्दू शाळा क्र. २ चे मुख्याध्यापक, सर्व शिक्षक सहभागी झाले होते.