धनंजय मुंडेंना कोर्टाचा दणका : करुणा शर्मा यांन न्याय!

लोकशाही न्यूज नेटवर्क

बीड मधील मस्साजोगचे सरपंच संतोष देशमुख यांच्या हत्याप्रकरणातील आरोपी वाल्मिक कराड हा धनंजय मुंडेचा निकटवर्तीय असल्याचे आरोप करत मुंडे यांनी नैतिकतेच्या आधारावर राजीनामा देण्यात यावा अशी मागणी विरोधकांसह सत्ताधारी पक्षातील काही नेत्यंनी केला होता. या प्रकरणावरून धनंजय मुंडे खिंडीत सापडलेले असतानाचा आता त्यांच्या अडचणी आणखीनच वाढल्या आहेत. धनंजय मुंडे हे घरगुती हिंसाचार प्रकरणात दोषी आढळले आहेत. करूणा शर्मांनी लावलेले आरोप कोर्टाकडून मान्य करण्यात आले आहेत. करूणा शर्मांना प्रत्येक महिन्याला 2 लाख रुपये पोटगी देण्याचे आदेश कोर्टाने दिले आहेत. यामुळे धनंजय मुंडेंना मोठा झटका बसला आहे.

दरम्यान आधीच आरोपांमुळे अडचणीत आलेल्या धनंजय मुंडे यांचा पाय आणखीनच खोलात गेला आहे. सामाजिक कार्यकर्त्या तृप्ती देसाई यांनी तर कोर्टाचा निकाल येताच धनंजय मुंडे यांनी तात्काळ राजीनामा देण्याची मागणी केली आहे. तसेच मुंडे यांच्या पापाचा घडा भरत आल्याचंही तृप्ती देसाई यांनी म्हटलं आहे.

ही तर सुरुवात : तृप्ती देसाई

तृप्ती देसाई यांनी मीडियाशी संवाद साधताना ही प्रतिक्रिया दिली आहे. खरं तर करुणा शर्मांना न्याय मिळाला असं म्हणावं लागेल. करुणा शर्मा वारंवार सांगत होत्या मी धनंजय मुंडेंची पहिली पत्नी आहे. माझ्यावर घरगुती हिंसाचार झाला आहे. मला त्रास देण्याचा प्रयत्न केला जातो. मला खर्च दिला जात नाही. कोणतीही दखल घेतली नसल्याने त्या न्यायालयात गेल्या. कोर्टाने आज त्यांना न्याय दिला. त्यांची पोटगी असेल किंवा महिन्याला त्यांच्या मुलीचा खर्च असेल तो देण्याचं मान्य केलं आहे. मुंडेंनी आता तरी आरोप मान्य केलं पाहिजे. कोर्टानेच त्यांना दोषी ठरवलं आहे, असं तृप्ती देसाई म्हणाल्या.

धनंजय मुंडे यांचे अनेक प्रकरण समोर येत आहेत. याबाबत न्यायालयीन लढाई लढली आणि पुरावे असतील तर 100 टक्केंना योग्य न्याय मिळेलच, असं सांगतानाच करुणा शर्मा या मी करुणा शर्मा नाही तर करुणा मुंडे आहे, असं सांगायच्या. त्यामुळे त्यांना आता करुणा मुंडेच म्हटलं पाहिजे, असं तृप्ती देसाई यांनी म्हटलं आहे.

हे गंभीर प्रकरण आहे. आतापर्यंत धनंजय मुंडेंनी राजकीय दबावापोटी आणि पदाचा गैरवापर करत अनेक कृत्य केली आहेत. मला वाटतं आता पापाचा घडा भरत आला आहे. खंडणी प्रकरणातही मुंडेंचीच माणसं आहेत. संतोष देशमुख हत्या झाली त्यात वाल्मिक कराड हा मुंडेंचा उजवा हात आहे, हे सर्वांना माहीत आहे. ही टोळी त्यांच्या जवळची होती हे माहीत आहे. त्यामुळे मुंडे यांनी नैतिकतेने राजीनामा द्यायला हवा होता. त्यांनी दिला नाही. सर्व पुरावे आले आहेत. अजूनही त्यांचा राजीनामा होत नाही, असं त्यांनी सांगितलं.

करुणा शर्मा प्रकरणात झटका बसणं ही तर सुरुवात आहे. मुंडेंना कोर्टाचा हा पहिला झटका मिळाला आहे. मुंडेंचा राजीनामा होणं गरजेचं आहे. कोर्टाचा निर्णय पॉझिटिव्ह आला. त्यामुळे या पुढचे निर्णय सकारात्मक होतील. त्यामुळे धनंजय मुंडेंचा राजीनामा होणं गरजेचं आहे, असंही त्या म्हणाल्या.

कोण आहेत करुणा शर्मा?

करूणा शर्मा या धनंजय मुंडे यांच्या (पहिली) पत्नी आहेत, यासाठी त्या मागच्या काही वर्षांपासून त्या कायदेशीर लढाई लढत आहेत. वांद्रे फॅमिली कोर्टामध्ये त्यांनी याचिका दाखल केली होती. धनंजय मुंडेंवर त्यांनी घरगुती हिंसाचाराचा आरोप लावला होता. यावर झालेल्या सुनावणीत कोर्टाने दोन्ही बाजू ऐकून घेतल्या आणि करूणा शर्मा याच धनंजय मुंडे यांच्या पहिली पत्नी आहेत हे मान्य केलं.तसेच करूणा यांच्यावर घरगुती हिंसाचार झाल्यांचही कोर्टाने मान्य केलं. करुणा शर्मा यांची गंभीर तक्रार होती. त्यांनी धनंजय मुंडे यांच्यावर बलात्कार, घरगुती हिंसाचार आणि इतर कलमांर्गत गुन्हा दाखल करण्याची मागणी केली होती. इतकंच नाही तर आपल्या दोन्ही मुलांना धनंजय मुंडे यांनी त्यांच्या चित्रकूट बंगल्याच्या मागच्या खोलीत 3 महिने कोंडून ठेवल्याचा आरोप त्यांनी केला होता.