लोकशाही न्यूज नेटवर्क
घरगुती एलपीजी गॅस कनेक्शन असलेल्या ग्राहकांसाठी महत्त्वाची अपडेट समोर आली आहे. ई-केवायसी पूर्ण करण्यासाठी देण्यात आलेली अंतिम मुदत आता १६ ऑगस्टवरून २३ ऑगस्ट २०२६ पर्यंत वाढवण्यात आली आहे. त्यामुळे ज्या ग्राहकांची अजूनही ई-केवायसी झालेली नाही, त्यांना आता काही दिवस वाढवून दिले आहेत.
ई-केवायसी करण्यासाठी मोठ्या संख्येने ग्राहक एकाच वेळी प्रयत्न करत असल्याने एलपीजी कंपन्यांच्या अॅपवर तांत्रिक अडचणी, सर्व्हर डाउन आणि प्रोसेस मध्येच थांबवण्याच्या समस्या निर्माण झाल्या होत्या. काही ठिकाणी गॅस एजन्सींमध्येही ई-केवायसी करण्यासाठी ग्राहकांच्या लांब रांगा लागल्याचे पाहायला मिळाले. या अडचणी लक्षात घेऊन मुदत वाढवण्यात आली आहे.
ज्या ग्राहकांनी आधीच ई-केवायसी प्रोसेस पूर्ण केली आहे. त्यांना पुन्हा प्रोसेस करण्याची गरज नाही. आपल्या ई-केवायसी ची स्थिती संबंधित एलपीजी कंपनीच्या अधिकृत अॅपवर किंवा गॅस एजन्सीकडून तपासता येईल.
महत्त्वाचं म्हणजे, मुदतीपर्यंत ई-केवायसी न केल्याने गॅस कनेक्शन तात्काळ बंद किंवा रद्द होईलच असं नाही. मात्र सरकारी एलपीजी सब्सिडीवर परिणाम होऊ शकतो आणि ग्राहकाला सिलेंडर विनासबसिडी घ्यावा लागू शकतो. एलपीजी ग्राहकांना घरबसल्या ई-केवायसी करण्यासाठी संबंधित गॅस कंपनीचे अधिकृत मोबाइल अॅप वापरता येईल.
अशी करा प्रोसेस..
१. अधिकृत एलपीजी अॅप डाउनलोड करून कनेक्शनशी संबंधित मोबाइल क्रमांकाने लॉगिन करा.
२. ई-केवायसी किंवा आधार अपडेट पर्याय निवडा.
३. तुमचा १२ अंकी आधार क्रमांक प्रविष्ट करा.
४.आधार आधारित Face Authentication प्रोसेस पूर्ण करा.
५. प्रोसेस यशस्वी झाल्यानंतर स्क्रीनवर KYC पूर्ण झाल्याचा मेसेज दिसेल. काही प्रकरणांमध्ये SMS च्या मदतीनेही माहिती मिळवू शकता.
