जळगाव, लोकशाही न्यूज नेटवर्क
आजकाल अनेक जण शेअर मार्केटमध्ये गुंतवणूक करत आहेत. शेअर मार्केटमध्ये जास्तीत जास्त फायदा मिळवून देण्याचे आमिष देत लोकांना गंडवले जात आहे. अशाच प्रकारे एका शिक्षकाला देखील फसवण्यात आले आहे.
जळगाव शहरातील प्रेमनगर परिसरात राहणारे शिक्षक जयेश अरविंदकुमार मेहता (वय ४९) यांची फसवणूक झाली आहे. मेहता यांच्याशी २२ फेब्रुवारीला २ जणांनी संपर्क साधून शेअर मार्केटमध्ये गुंतवणूक केल्यास ५० टक्के नफा मिळेल, असे सांगत आमिष दाखविले. यासाठी एका ॲपवर रजिस्ट्रेशन करण्यास सांगितले. यावर शिक्षकाने देखील विश्वास ठेवला.
दरम्यान समोरच्या व्यक्तीने सांगितल्यानुसार, शिक्षकाने अँप डाउनलोड करत रजिस्ट्रेशन केले. यावर सुरुवातीला गुंतवणूक केलेल्या रकमेवर मेहता यांना २० हजार रुपयांचा परतावा देखील देण्यात आला. त्यातून मेहता यांचा अधिक विश्वास बसला. त्यामुळे शिक्षकाने टप्प्याटप्प्याने गुंतवणूक करत राहिले. अशी साधारण १४ लाख ८३ हजार ५२५ इतकी रक्कम गुंतवणूक करून टाकली होती.
टप्प्याटप्प्याने साधारण १५ लाख रुपये इतकी रक्कम गुंतविल्यानंतर देखील त्यांना कोणताही परतावा व मूळ रक्कम मिळाली नाही. दरम्यान रक्कम मिळत नसल्याने फसवणूक झाल्याचे लक्षात आल्यानंतर मेहता यांनी सायबर पोलिस ठाण्यात फिर्याद दिली. त्यावरून फसवणूक करणाऱ्यांविरुद्ध गुन्हा दाखल करण्यात आला आहे. पोलिस निरीक्षक महेश शर्मा तपास करीत आहेत.
