जळगाव बसस्थानकावर महिलेची ६० हजारांची सोनसाखळी चोरी
जळगाव लोकशाही न्यूज नेटवर्क
: शहरातील नवीन बसस्थानक परिसरात एका महिला प्रवाशाच्या गळ्यातील ६० हजार रुपये किमतीची सोनसाखळी अज्ञात चोरट्याने हिसकावून नेल्याची घटना घडली आहे. ही घटना २४ सप्टेंबर रोजी सायंकाळी ५ वाजेच्या सुमारास घडली असून, याप्रकरणी २८ सप्टेंबर रोजी रात्री उशिरा जिल्हा पेठ पोलिस ठाण्यात गुन्हा दाखल झाला आहे.
जामनेर येथील कल्पना सुनील लखोटे (वय ५९, रा. माळी गल्ली, जामनेर) या काही कामानिमित्त जळगाव शहरात आल्या होत्या. काम आटोपून त्या जामनेरला परतण्यासाठी नवीन बसस्थानकावर गेल्या असताना, गर्दीचा फायदा घेत अज्ञात चोरट्याने त्यांच्या गळ्यातील सोनसाखळी तोडून पळ काढला. या साखळीची किंमत अंदाजे ६० हजार रुपये आहे.
या घटनेमुळे बसस्थानक परिसरातील सुरक्षिततेवर प्रश्नचिन्ह निर्माण झाले आहे. जिल्हा पेठ पोलिस या प्रकरणाचा पुढील तपास करीत आहेत.
