जुन्या वादातून तृतीयपंथीयावर ब्लेडने हल्ला, तिघांविरोधात गुन्हा दाखल
भुसावळ येथील घटना
भुसावळ;- शहरातील केला सायडींगजवळ गुरुवारी दुपारी जुन्या वादातून तृतीयपंथीयावर ब्लेडने हल्ला करण्यात आला. ही घटना 20 मार्च रोजी दुपारी दीड वाजता घडली. हल्ल्यात तृतीयपंथीय जखमी झाले असून, या प्रकरणी तिघांविरोधात भुसावळ शहर पोलिसात गुन्हा दाखल करण्यात आला आहे.
पोलिसांच्या माहितीनुसार, तक्रारदार तानिया (29, फुलगाव, भुसावळ) या तृतीयपंथीय असून, त्यांच्याशी बोलत नसल्याच्या जुन्या वादातून संशयित रितीक सैंदाणे (भुसावळ) याने केला सायडींगजवळ ब्लेडने हल्ला केला. या हल्ल्यात डोक्याला गंभीर जखम झाली असून मोठ्या प्रमाणावर रक्तस्त्राव झाला. त्यांच्या सहकाऱ्यांनी तातडीने त्यांना भुसावळातील ट्रामा केअर सेंटरमध्ये दाखल केले.
घटनेची माहिती मिळताच शहर पोलीस निरीक्षक उद्धव डमाळे यांच्या मार्गदर्शनाखाली पोलिसांनी ट्रामा सेंटर गाठून तानियाचा जबाब नोंदवला. यानंतर संशयित रितीक सैंदाणे आणि दोन अनोळखी व्यक्तींविरोधात शहर पोलिसात विविध कलमान्वये गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक ईकबाल सैय्यद करीत आहेत.
