सावधान ! कोरोना पुन्हा डोकेवर काढतोय…

मुंबई, लोकशाही न्यूज नेटवर्क 

सन 2019 आणि त्यानंतरच्या काही वर्षांमध्ये संपूर्ण जगात हाहाकार माजवणाऱ्या कोविडने पुन्हा एकदा डोके वर काढायला सुरुवात केल्याचे दिसत आहे. वाढत्या कोविड रुग्णांमध्ये, केईएम रुग्णालयात दोन मृत्यूंची नोंद झाली आहे. या दोन्ही रुग्णांचे कोविड रिपोर्टही पॉझिटिव्ह आले आहेत. परंतु रुग्णालय प्रशासनाने स्पष्ट केले आहे की, एका रुग्णाचा मृत्यू कर्करोगामुळे झाला. तर, दुसऱ्याचा किडनीच्या गंभीर आजाराने झाला आहे. तथापी डॉक्टर आणि बीएमसी अधिकाऱ्यांनी खबरदारी घेण्यास सांगितले आहे. आणि लोकांना न घाबरण्याचे आवाहन केले आहे.

परळ येथील 59 वर्षीय महिलेचा केईएम रुग्णालयात मृत्यू झाला. महिलेला कर्करोग होता, रुग्णालयाने मृतदेह कुटुंबाला देण्यास नकार दिला. कुटुंबाने माजी नगरसेवक अनिल कोकीळ यांच्याशी संपर्क साधला. अनिल कोकीळ म्हणाले की, महिलेला कर्करोग होता, परंतु तिचा अहवाल कोविड पॉझिटिव्ह आला. अशा परिस्थितीत, रुग्णालयाने प्रोटोकॉलनुसार मृतदेह कुटुंबाला दिला नाही. या संदर्भात रुग्णालय प्रशासनाशी बोलल्यानंतर, मृतावर कोविड प्रोटोकॉलनुसार कुटुंबातील फक्त दोन सदस्यांसह भोईवाडा स्मशानभूमीत अंत्यसंस्कार करण्यात आले.

बीएमसीच्या कार्यकारी आरोग्य अधिकारी डॉ. दक्षा शाह म्हणाल्या की, नागरिकांनी घाबरून जाण्याची गरज नाही. आम्ही कोविड प्रकरणांवर लक्ष ठेवून आहोत. ऋतू बदलामुळे संसर्ग होण्याची शक्यता असते. मे महिन्यात कोविडच्या रुग्णांमध्ये वाढ झाली आहे, परंतु रुग्णांमध्ये सौम्य लक्षणे आहेत.

प्रमाणपत्रातील कारण कोविड नाही

मृताच्या मृत्युपत्रात मृत्यूचे कारण कोविड असे दिलेले नाही, पण मग प्रश्न असा पडतो की कोविड चाचणी का करण्यात आली? दुसऱ्या एका प्रकरणात, एका 14 वर्षांच्या मुलीचा मृत्यू झाला, जी किडनीच्या गंभीर आजाराने ग्रस्त होती. याही मुलीचा कोविड रिपोर्ट पॉझिटिव्ह आला आहे. रुग्णालयाचे अधीक्षक डॉ. मोहन देसाई यांनी सांगितले की, दोन्ही रुग्णांच्या मृत्यूचे कारण इतर गंभीर आजार होते. लोकांनी घाबरून जाण्याची गरज नाही, या संदर्भात अधिक माहिती रुग्णालय प्रशासन प्रसारित करेल.