लोकशाही न्यूज नेटवर्क
पाचोरा तालुक्यातील शेवाळे शिवारातील शेतात विक्रीसाठी काढुन ठेवलेल्या मका पिकास २ एप्रिल रोजी रात्री ते ३ एप्रिल रोजी पहाटेच्या सुमारास अचानक आग लागल्याने शेतकऱ्याचे सुमारे १ लाख रुपयांचे नुकसान झाले असुन शेतकरी हवालदिल झाला आहे.
भागाबाई बाजीराव पाटील रा. निंभोरी बुद्रुक ता. पाचोरा यांची शेवाळे शिवारात गट क्रमांक २२१/२ ही शेती जमिन आहे. सदरची शेती त्यांचे मुलगा भगवान बाजीराव पाटील (पत्रकार) हे करतात. या शेतीवर भगवान पाटील यांनी काबाडकष्ट करून मका पिक लावले होते. अतिशय मेहनत करुन भगवान पाटील यांनी पिकास वाढीस लावले. पिक पुर्ण तयार झाल्यानंतर विक्री करायची असल्याने ते काढणी करुन ढिग तयार केला होता. दरम्यान २ एप्रिल रोजी रात्री ते ३ एप्रिल रोजी पहाटे सुमारास मका पिकास अचानक आग लागली व या आगीत सुमारे १ लाख रुपये किंमतीचा ४० ते ५० क्विंटल मका जळुन खाक झाला.
सदरचा प्रकार भगवान पाटील हे ३ एप्रिल रोजी पहाटे शेतात गेले असता त्यांचे लक्षात आला. मका पिकाच्या ढिगाऱ्या वरुन विज वितरण कंपनीच्या विद्युत तारा असल्याने व शेत शिवाराची लाईट रात्रीची असल्याने विद्युत तारांमुळेच आग लागल्याचा प्राथमिक अंदाज व्यक्त केला जात असुन विज वितरण कंपनीकडे हताश झालेल्या शेतकऱ्याने नुकसान भरपाईची मागणी केली आहे.
