नाशिक
महायुतीत जागावाटपाचा तिढा सुटला असला तरी आघाडीत अद्याप काही जागांवर पेच कायम आहे. महाविकास आघाडीत इच्छुकांची संख्या वाढत असल्याने उमेदवारीवरून जोरदार रस्सीखेच सुरू आहे. मार्क्सवादी कम्युनिस्ट पक्षाने महाविकास आघाडीत सहा जागांवर उमेदवार देण्याचा इशारा दिला आहे, तर मालेगावसह राज्यातील तीन जागांवर समाजवादी पक्षाने आपले उमेदवार जाहीर केले आहेत. नाशिक जिल्ह्यात राष्ट्रवादी काँग्रेस शरद पवार पक्षाला सर्वाधिक सहा जागांवर उमेदवारी मिळणार आहे. मात्र, अंतिम यादी स्पष्ट झाल्यानंतरच नेमके चित्र स्पष्ट होणार आहे. नांदगावच्या लढतीवरून कांदे-भुजबळ वाद पुन्हा रंगला आहे.
महाविकास आघाडीत 12 जागांची मागणी केली असताना कळवण आणि डहाणू या दोन जागांवर माकपची बोळवण करण्यात आल्याची चर्चा आहे. माकपला या दोन जागांसह नाशिक पश्चिम आणि सोलापूर या दोन अतिरिक्त जागा दिल्या नाहीत तर नाशिक जिल्ह्यात सहा जागांवर उमेदवार देऊ, असा इशारा माकपचे जिल्हा कमिटीचे सदस्य दिनेश सातभाई यांनी दिला आहे. त्यामुळे जागावाटपावरून रस्सीखेच कायम असल्याचे चित्र आहे.
मालेगावातून शान-ए-हिंद
समाजवादी पक्षाने माजी नगरसेविका शान-ए- हिंद निहाल अहमद यांना मालेगाव मध्यमधून तर भिवंडीमधून सईस शेख व रियाज आर्मी अशा तिघांची उमेदवारी जाहीर केली. मुस्लिमांना लक्ष्य करण्यासाठी भाजपने लोकसभेत वक्फ बोर्ड विधेयक आणले. या विधेयकाच्या माध्यमातून भाजप मुस्लिम समाजाच्या जमिनी हिरावून घेण्याचा प्रयत्न करीत आहे. त्याला समाजवादी पक्षाने विरोध केला होता. देशात तेढ निर्माण करणाऱ्या भाजपला विधानसभा निवडणुकीत पराभूत करून समाजवादी पक्षाच्या उमेदवारांच्या मागे ताकद उभी करा, असे आवाहन समाजवादी पक्षाचे राष्ट्रीय अध्यक्ष खासदार अखिलेश यादव यांनी केले.
‘राशप’ मोठा भाऊ
महाविकास आघाडीचे जागावाटप जवळपास निश्चित झाले असून, राष्ट्रवादी काँग्रेस शरदचंद्र पवार (राशप) पक्ष जिल्ह्यातील जागावाटपात मोठा भाऊ ठरला आहे. जिल्ह्यातील 15 पैकी दिंडोरी, देवळाली, येवला, सिन्नर, नाशिक पूर्व, बागलाण या सहा जागा ‘राशप’च्या वाट्याला आल्या असून, कळवणची जागाही त्यांच्याकडे आहे. परंतु, ती ‘माकप’ला सोडण्यात येणार आहे.
