लोकशाही न्यूज नेटवर्क
पश्चिम आशियात इराण आणि अमेरिकेमध्ये पुन्हा संघर्ष पेटल्याचे दिसून येत आहे. दोन्ही देशामध्ये तणाव पेटल्याने युद्धाची शक्यता व्यक्त केली जात आहे. एकीकडे दोन्ही देशाची युद्ध समाप्तीसाठी करार करण्याची चर्चा सुरू आहे. त्याचवेळी अमेरिका आणि इराण एकमेकांवर हल्ला करत असल्याचे समोर येत आहे. इराणने काल सामुद्रधुनीवर असलेल्या ४ जहाजांवर हल्ला केला. त्यानंतर अमेरिकेचं फायटर जेट देखील पाडल्याचा दावा इराणने केला आहे. परंतु अमेरिकेने इराणचा दावा फेटाळून लावला आहे.
होर्मुझची सामुद्रधुनी जगातील इंधनाच्या व्यापारासाठी महत्वपूर्ण आणि किफायतशीर समुद्री मार्ग मानला जातो. या मार्गातून जगातील जवळपास २० टक्के कच्च्या तेलाची वाहतूक केली जाते. परंतु या मार्गावर जहाजांवर हल्ले होऊ लागल्याने आंतरराष्ट्रीय बाजारात खळबळ उडाली आहे. होर्मुझच्या सामुद्रधुनीवरील तणावाचा थेट शेअर बाजार आणि कच्च्या तेलाच्या किंमतीवर परिणाम होताना दिसत आहे.
बुशहर प्रांताचे गव्हर्नर मसूद तंगेस्तानी यांनी विधान करत म्हटलं की, इराणी सैन्याने बुशहर क्षेत्रात अमेरिकेच्या सैन्य दलाचं विमान पाडलं. परंतु अमेरिकेने इराणचा दावा फेटाळून लावला आहे. इराणने अमेरिकेच्या कोणत्याही विमानाला नुकसान पोहोचवलं नाही.
मीडिया रिपोर्टनुसार, अमेरिका आणि इराणमध्ये ६० दिवसांत युद्ध थांबवण्याबाबत करार करण्यावर सहमती झाली आहे. परंतु करार करण्याबाबत अमेरिकेचे राष्ट्राध्यक्ष डोनाल्ड ट्रम्प आणि इराणचे सुप्रीम लीडर मोजतबा खामेनेई यांची मंजुरी मिळालेली नाही. या कराराचा उद्देश हा पश्चिम आशियातील तणाव कमी करण्याचा आहे. दोन्ही देशात शांततेसाठी करार होतो का, हे पाहावे लागेल.
