लोकशाही न्यूज नेटवर्क
दिल्लीच्या जंतरमंतरनंतर आता झारखंडच्या रांचीमध्ये परीक्षा घोटाळ्याच्या विरोधात आंदोलन पेटलं आहे. गेल्या 17 दिवसांपासून विद्यार्थ्यांचं आंदोलन सुरू आहे. या विद्यार्थ्यांनी आज सोमवारी झारखंडच्या विधानभवनावर मोर्चा काढला. या मोर्चाच्या पार्श्वभूमीवर पोलिसांचा मोठा फौजफाटा तैनात करण्यात आला होता.
पोलिसांचा मोठा फौजफाटा असतानाही विद्यार्थी आंदोलकांनी बॅरिकेट्स हटवून विधानभवनाच्या दिशेकडे कूच केली. परंतु विद्यार्थी आक्रमक झाल्यानंतर पोलिसांनी लाठीचार्ज करण्यास सुरुवात केली. त्यामुळे दिल्लीच्या जंतर-मंतरची पुनरावृत्ती रांचीमध्ये पाहायला मिळाली.
झारखंडमध्ये गेल्या काही दिवसांपासून विद्यार्थी आंदोलन सुरू आहे. विद्यार्थी आंदोलकांनी आज विधानभवन मार्चचा नारा दिला होता. विद्यार्थ्यांच्या विधानभवन मार्चच्या पार्श्वभूमीवर पोलिसांनी कडक सुरक्षा व्यवस्था तैनात करण्यात आली होती. विधानभवनाच्या परिसरात सैन्य दलातील 1500 तैनात करण्यात आले होते. आंदोलनावर देखरेख ठेवण्यासाठी ड्रोन कॅमेऱ्याचाही वापर केला जात आहे.
एकीकडे सरकारने विद्यार्थ्यांच्या सर्व मागण्या मान्य केल्याचा दावा केला आहे. त्यानंतरही विद्यार्थी माघार घ्यायला तयार नसल्याची माहिती मिळत आहे. खरंतर विद्यार्थ्यांनी मागण्या मान्य केल्याचा सरकारचा दावा फेटाळून लावला आहे. त्यामुळे रांचीमध्ये सरकार आणि विद्यार्थ्यांमध्ये संघर्ष पेटल्याचे समोर येत आहे.
