चंद्रपूर, लोकशाही न्यूज नेटवर्क
बालकामगार विरोधी सप्ताहादरम्यान चंद्रपूर जिल्ह्यातील ब्रह्मपुरी येथे बालमजुरीचा गंभीर प्रकार उघडकीस आला असून, चाईल्ड हेल्पलाईन 1098 वर प्राप्त झालेल्या एका तक्रारीच्या आधारे करण्यात आलेल्या संयुक्त कारवाईत तब्बल ९ बालकामगारांची सुटका करण्यात आली. या कारवाईमुळे बालकांच्या हक्कांवर गदा आणणाऱ्या प्रवृत्तींना मोठा धक्का बसला आहे.
जिल्हाधिकारी चंद्रपूर यांच्या मार्गदर्शनाखाली जिल्ह्यात बालकामगार शोध मोहीम राबविण्यात येत आहे. त्याच अनुषंगाने चाईल्ड हेल्पलाईन 1098 वर ब्रह्मपुरी शहरातील एका खाणावळीत अल्पवयीन मुलांकडून काम करून घेत असल्याची माहिती प्राप्त झाली. माहितीची शहानिशा केल्यानंतर जिल्हा महिला व बाल विकास विभाग, जिल्हा बाल संरक्षण कक्ष आणि ब्रह्मपुरी पोलिस स्टेशन यांच्या संयुक्त पथकाने संबंधित ठिकाणी धाड टाकली.
कारवाईदरम्यान ९ अल्पवयीन बालकामगार आढळून आले. सर्व बालकांची तातडीने सुटका करून त्यांना बाल कल्याण समितीसमोर हजर करण्यात आले. समितीच्या आदेशानुसार त्यांच्या संरक्षण व पुनर्वसनाची कार्यवाही सुरू करण्यात आली आहे.
प्रकरणाची गंभीर दखल घेत संबंधितांवर कायदेशीर कारवाईची प्रक्रिया सुरू असून पुढील तपास ब्रह्मपुरी पोलिस करीत आहेत. तसेच कामगार विभागामार्फतही आवश्यक कार्यवाही करण्यात येणार असल्याची माहिती प्रशासनाकडून देण्यात आली.
नागरिकांना आवाहन..
जिल्हा महिला व बाल विकास अधिकारी मिनाक्षी ता. भुमे यांनी नागरिकांना आवाहन केले आहे की, बालकामगार, बालशोषण, बालविवाह किंवा संकटग्रस्त बालकांची माहिती मिळाल्यास तात्काळ 1098 चाईल्ड हेल्पलाईन वर संपर्क साधावा. नागरिकांच्या सतर्कतेमुळे अनेक बालकांचे आयुष्य सुरक्षित होऊ शकते.
बालमजुरी हा केवळ कायद्याचा भंग नसून बालकांच्या भविष्यावर होणारा थेट आघात आहे. शिक्षणाच्या वयात कामाच्या ओझ्याखाली दबलेल्या बालकांना मुक्त करण्यासाठी प्रशासनाने सुरू केलेल्या मोहिमेला समाजानेही सक्रिय साथ देण्याची गरज आहे. ब्रह्मपुरीतील कारवाईने हे सिद्ध केले आहे की, एका जागरूक नागरिकाच्या फोनमुळेही अनेक बालकांचे हरवलेले बालपण परत मिळू शकते.
