गडचिरोली, लोकशाही न्यूज नेटवर्क
जिल्ह्यातील भामरागड तालुक्यातील एका आजारी मुलाचा नागपुरातील खासगी रुग्णालयात उपचार सुरू आहे. पैसे नसल्याने त्याच्या आईने मंगळसूत्र विकून रक्कम उभी केली. व्हेंटिलेटरवर असलेल्या मुलाच्या उपचारासाठी प्रसंगी उपाशी राहून आई-वडील प्रयत्न करीत होते. मदतीसाठी वडिलांनी थेट मुख्यमंत्री देवेंद्र फडणवीस यांना पत्र लिहून साकडे घातले. गडचिरोलीचे पालकत्व स्वीकारणारे मुख्यमंत्री फडणवीस यांनी अतिदुर्गम भागातील त्या मुलाची आणि कुटुंबीयांची व्यथा समजून तातडीने दखल घेत मोफत उपचार करण्याचे निर्देश दिले. या घटनेतून मुख्यमंत्री फडणवीस यांची संवेदनशीलता दिसून आली आहे.
भामरागड तालुक्यातील हितापाडी येथील 17 वर्षीय सुनील रमेश पुंगाटी या मुलाला ताप आल्याने त्याची प्रकृती खालावली. वडील रमेश पुंगाटी हे उपचारासाठी सुनीलला नागपुरात घेऊन आले. एका खासगी रुग्णालयात दाखल केले. उपचारासाठी एक लाख रुपये खर्च असल्याने मुलाच्या आईने आपले मंगळसूत्र विकून रुग्णालयात पैसे भरले. मुलगा व्हेंटिलेटरवर असून प्रकृती गंभीर असल्याने आईवडील चिंतेत होते. पैसे नसल्याने प्रसंगी ते उपाशी राहत होते. मुलाच्या वडिलांनी मदतीसाठी मुख्यमंत्र्यांना पत्र लिहून साकडे घातले. त्या मुलाची आणि आईवडिलांची अवस्था एका मेसेजद्वारे मुख्यमंत्री देवेंद्र फडणवीस यांना समजल्यानंतर त्यांनी तत्काळ दखल घेतली.
दरम्यान, आता मुख्यमंत्री सहाय्यता निधीतून वैद्यकीय सहाय्यता मिळण्यासाठी आजारांचे पुनर्विलोकन करणे, आजारांसाठी देण्यात येणाऱ्या अर्थसहाय्याची रक्कम नव्याने निश्चित करणे आणि रुग्णालय संलग्नीकरणासाठी निकष ठरवण्यासाठी शिफारशी करण्यासाठी समिती स्थापन करण्यात आली आहे. याबाबत शासन निर्णय काढण्यात आल्याची माहिती मुख्यमंत्री सहाय्यता निधी कक्षाचे प्रमुख रामेश्वर नाईक यांनी दिली.
मोफत उपचार होणार
सदर मुलावर मोफत उपचारासाठी कारवाई करण्याचे निर्देश मुख्यमंत्री वैद्यकीय सहायता कक्षाचे प्रमुख रामेश्वर नाईक यांना दिले. त्यानंतर रामेश्वर नाईक यांनी त्या खासगी रुग्णालयाशी संपर्क साधून मोफत उपचार करण्यासाठी सूचना केल्या. तसेच मुलाच्या उपचारासाठी मंगळसूत्र विकून भरलेली रक्कम त्या कुटुंबाला परत मिळणार असल्याचे सांगितले.