थेट कुटुंबावरच चॉपर आणि कोयत्याने प्राणघातक हल्ला

जुन्या वादातून हुडको परिसरात तरुणाचा खून !

0

 

जळगाव, लोकशाही न्यूज नेटवर्क

जुन्यावादातून घरातील कुटुंबावर चॉपर, कोयता आणि काठ्यांनी  प्राणघातक हल्ला केल्याची धक्कादायक घटना रविवारी १९ जानेवारी रोजी सकाळी १० वाजता शहरातील पिंप्राळा हुडको परिसरात घडली. या प्राणघातक हल्ल्यात एका तरुणाचा मृत्यू झाला असून मुकेश रमेश शिरसाठ (वय २६) असे या तरुणाचे नाव आहे. या घटनेमुळे परिसरामध्ये खळबळ उडाली आहे. तर जखमी झालेल्या ५ जणांना जिल्हा शासकीय वैद्यकीय महाविद्यालयात उपचारासाठी दाखल करण्यात आले आहे.

मिळालेल्या माहितीनुसार, जळगाव शहरातील पिंप्राळा हुडको परिसरामध्ये राहणाऱ्या शिरसाठ कुटुंबावर जुन्या वादातून सात ते आठ जणांनी चॉपर, कोयता, चाकू आणि लाकडी काठीने जीवघेणा हल्ला केला. या हल्ल्यामध्ये मुकेश रमेश शिरसाठ (वय- २६ रा. पिंप्राळा हुडको, जळगाव) याचा मृत्यू झाला तर निळकंठ सुखदेव शिरसाट वय-४५, कोमल निळकंठ शिरसाठ वय-२०, निळकंठ शिरसाठ वय-२५, ललिता निळकंठ शिरसाठ वय-३०, आणि मुकेश रमेश शिरसाठ वय-२६, सनी निळकंठ शिरसाठ वय २१, सर्व रा. पिंप्राळा हुडको, जळगाव हे गंभीर जखमी झाले.

दरम्यान जखमींना तातडीने जिल्हा शासकीय वैद्यकीय महाविद्यालयात दाखल करण्यात आले. यातील मुकेश शिरसाठ या तरुणाचा उपचारादरम्यान मृत्यू झाला. त्यामुळे जिल्हा शासकीय वैद्यकीय महाविद्यालयात त्यांच्या नातेवाईकांनी एकच आक्रोश केला होता. यावेळी महाविद्यालयात मित्र परिवारासह नातेवाईकांची मोठ्या संख्येने गर्दी पाहायला मिळाली.

सदर घटना घडल्यानंतर रामानंदनगर पोलीस ठाण्याचे पोलीस कर्मचारी जळगाव स्थानिक गुन्हे शाखेचे वरिष्ठ पोलीस निरीक्षक बबन आव्हाड यांच्यासह पथकाने घटनास्थळी धाव घेतली तसेच जिल्हा रुग्णालयात पोलिसांचा तगडा बंदोबस्त ठेवण्यात आला होता. दरम्यान या घटनेबाबत रामानंदनगर पोलीस ठाण्यात गुन्हा दाखल करण्याचे काम सुरू होते.

Leave A Reply

Your email address will not be published.