सहा लाखाची लाच घेताना चक्क मुख्याधिकारी ताब्यात

लोकशाही न्यूज नेटवर्क

बीड शहरातील रस्त्यांचे काँक्रीटीकरणाचे काम सुरु आहे. या कामाचे २ कोटी रुपयांचे बिल काढण्यासाठी बीडच्या माजलगाव नगरपालिकेचा मुख्याधिकारी चंद्रकांत चव्हाण याने लाचेची मागणी केली. त्यानुसार ६ लाख रुपयांची लाच घेताना चव्हाण यास संभाजीनगर लाचलुचपत प्रतिबंधक विभागाच्या पथकाने रंगेहाथ ताब्यात घेतले आहे. सदरची कारवाई चव्हाण यांच्या निवासस्थानी करण्यात आली.

बीड जिल्ह्यातील माजलगाव शहरामध्ये नगरोत्थान योजनेअंतर्गत विकासकामे सुरु आहेत. यात रस्त्यांचे काँक्रीटीकरणाचे काम करण्यात आले आहे. दरम्यान काम झाल्याने तक्रारदार कंत्राटदाराने माजलगावमध्ये केलेल्या सिमेंट रस्त्याचे दोन कोटी रुपयांचे बील प्रशासनांकडे सादर केले होते. हे बिल काढण्यासाठी मुख्याधिकारी चंद्रकांत चव्हाण याने सहा लाख तसेच उर्वरित कामातील रस्त्याच्या बाजुचे अतिक्रमण काढून अडथळे दूर करुन देण्यासाठी सहा लाख अशा बारा लाख रुपयांच्या लाचेची मागणी केली.

दरम्यान इतक्या मोठ्या प्रमाणात रक्कम देण्यास तक्रारदार तयार नसल्याने याबाबतची तक्रार संभाजीनगर येथील लाचलुचपत प्रतिबंधक विभागाकडे करण्यात आली होती. त्यानुसार एसीबीकडून तक्रारीची शहानिशा करण्यात आली. त्यानंतर सापळा रचण्यात आला होता. तर गुरुवारी तक्रारदार व पंच यांच्या समक्ष चंद्रकांत चव्हाण याने बारा लाख रुपये लाचेची मागणी केली. यातील सहा लाख रुपये गुरुवारी व उर्वरित सहा लाख शुक्रवारी (दि.11) रोजी देण्याचे ठरले होते.

दरम्यान ठरल्यानुसार तक्रारदार चंद्रकांत चव्हाण याच्या माजलगाव शहरातील पिताजी नगरी भागातील निवासस्थानी तक्रारदार सहा लाख रुपये घेवून गेले. यावेळी एसीबीचे पथकाने सापळा रचलेला होता. त्यावेळी चव्हाण याने सदरची सहा लाख रूपयांची रक्कम स्विकारताच त्याला लाचेच्या रकमेसह पकडण्यात आले. या प्रकरणी गुन्हा दाखल करण्यात आला आहे.