जळगाव : पाळधी ते तरसोद या राष्ट्रीय महामार्गावरील चौपदरीकरण रस्त्यावर शुक्रवार, २१ नोव्हेंबर रोजी दुपारी दोनच्या सुमारास मालवाहू ट्रक उलटण्याची घटना घडली. शहरातील कचरा डेपोजवळ ट्रकवरील नियंत्रण सुटल्याने हा अपघात झाला. यात ट्रक चालक आणि क्लिनर किरकोळ जखमी झाले असून त्यांच्यावर तातडीने उपचार करण्यात आले.
एमपी 12 एच 0662 क्रमांकाचा हा ट्रक मध्यप्रदेशातून ठिबक सिंचनासाठी वापरल्या जाणाऱ्या नळ्यांचे बंडल घेऊन धुळ्याकडे जात होता. कचरा डेपोजवळ पोहोचताच चालकाचे वाहनावरील नियंत्रण सुटले व ट्रक रस्त्याच्या कडेला कलंडला.
अपघातामुळे महामार्गावरील वाहतूक काही काळ पूर्णपणे विस्कळीत झाली. दोन्ही बाजूंना वाहनांच्या लांबच लांब रांगा लागल्या. माहिती मिळताच जळगाव तालुका पोलिसांनी घटनास्थळी धाव घेऊन वाहतूक सुरळीत करण्याचे व ट्रक बाजूला करण्याचे काम सुरू केले.
