चालत्या बसला आग, २० प्रवाशांचा कोळसा !
१६ जण गंभीर : जैसलमेर-जोधपूर महामार्गावर थैयत गावाजवळील घटना
जैसलमेर: राजस्थानमधील जैसलमेर-जोधपूर महामार्गावर थैयत गावाजवळ मंगळवारी (१४ ऑक्टोबर) दुपारी साडेतीन वाजण्याच्या सुमारास एका चालत्या एसी स्लीपर बसला भीषण आग लागली. या दुर्घटनेत २० प्रवाशांचा मृत्यू झाला, तर १६ जण गंभीर जखमी झाले आहेत.
प्रत्यक्षदर्शींच्या मते, आगीने काही क्षणांतच संपूर्ण बसला विळखा घातला. जीव वाचवण्यासाठी काही प्रवाशांनी चालत्या बस मधून उड्या मारल्या, तर काहींना बाहेर पडण्याची संधीच मिळाली नाही. बसमध्ये एकूण ५७ प्रवासी होते, त्यापैकी दोन मुले आणि चार महिलांसह १६ जण गंभीर जखमी झाले आहेत. जखमींना तातडीने जैसलमेरच्या जवाहर रुग्णालयात आणि नंतर पुढील उपचारांसाठी जोधपूरला हलवण्यात आले. काही जखमींवर लष्करी रुग्णालयात उपचार सुरू आहेत.
आगीमुळे बस पूर्णपणे जळून खाक
जैसलमेरचे जिल्हाधिकारी प्रताप सिंह यांनी सांगितले की, आग इतकी भीषण होती की बस पूर्णपणे जळून खाक झाली. घटनास्थळी फक्त मृतदेह आणि जळालेले अवशेष शिल्लक आहेत. मृतदेहांची ओळख पटवण्यासाठी जोधपूरहून फॉरेन्सिक तज्ज्ञांची टीम पाठवण्यात आली आहे.
राष्ट्रपती द्रौपदी मुर्मू आणि पंतप्रधान नरेंद्र मोदी यांनी या घटनेबद्दल तीव्र दुःख व्यक्त केले आहे. पंतप्रधानांनी प्रत्येक मृताच्या कुटुंबाला २ लाख रुपये व जखमींना ५०,००० रुपयांची मदत जाहीर केली आहे.
