लोकशाही न्यूज नेटवर्क
पुण्यात काल संध्याकाळच्या सुमारास अग्नितांडव पाहायला मिळाला. रांजणगाव वरून पुण्याच्या दिशेने नगर पुणे हायवे वरून जात असताना खासगी बसने अचानक पेट घेतल्याने आग लागली. ही बस कंपनीची असल्यामुळे त्यात कंपनीचे १५ ते २० कर्मचारी प्रवास करत होते वाहन चालकाच्या तत्परतेमुळे मोठा अनर्थ टळला असल्याचे वृत्त मिळाले आहे.
मिळालेल्या माहितीनुसार, काल संध्याकाळी सात वाजताच्या सुमारास मौजे कोरेगाव भीमा येथे वाहन क्रमांक MH 12 VF 6226 ही खाजगी बस रांजणगाव वरून पुण्याच्या दिशेने निघाली. दरम्यान ही बस नगर पुणे हायवे वरून जात असताना या बसमध्ये असलेल्या बॅटरीचे शॉर्टसर्किट झाले. या शॉर्टसर्किटमुळे बसने पेट घ्यायला सुरुवात केली. धावत्या बसने पेट घ्यायला सुरुवात केल्यानंतर बस चालकाच्या ही गोष्ट निदर्शनास आल्याने त्याने बस बाजूला लावली.
ही बस एका खाजगी कंपनीची असल्याने या बसमधून कंपनीचे १५ ते २० कर्मचारी प्रवासी प्रवास करत होते. वाहन चालकाने प्रसंगावधता राखत प्रवाशांना बसमधून खाली उतरवले. त्यामुळे मोठ्या प्रमाणावर होणारी जीवित हानी टळली. बसला आग लागताच अग्निशमन दलाला पाचारण करण्यात आले.
अग्निशमन दलाने घटनास्थळी दाखल होत भडका उडालेल्या आगीवर नियंत्रण मिळवले. दरम्यान धावत्या गाडीला आग लागण्याचे प्रमाण वाढले आहे. ही बाब अत्यंत गंभीर आहे. सदर घटनेत वाहन चालकाच्या तत्परतेमुळे मोठी जीवित हानी टळली असून बस जळून खाक झाल्याने वीत्त हानी निर्माण झाली.
