लोकशाही न्यूज नेटवर्क
तेलंगणातील विकाराबाद जिल्ह्या बसचा भीषण अपघात झाला. अनंतगिरी घाट रस्त्यावर गावकऱ्यांना घेऊन जाणारी खासगी बस उतारावरून जात असताना अचानक पलटी झाली. या दुर्घटनेत चार महिलांचा मृत्यू झाला असून अनेक प्रवासी जखमी झाले आहेत. बसचे ब्रेक फेल झाल्याने चालकाचे नियंत्रण सुटल्याचा प्राथमिक अंदाज पोलिसांनी व्यक्त केला आहे.
मिळालेल्या माहितीनुसार, पटनचेरू येथील केसरम गावातील सुमारे ५४ प्रवासी चिताकुंटा गावात एका अंत्यविधीसाठी जात होते. याचदरम्यान अनंतगिरी हिल्स परिसरातील घाट रस्त्याच्या उतारावर ही दुर्घटना घडली. बस उतारावरून खाली येत असताना चालकाला वाहनावर नियंत्रण ठेवता आले नाही. त्यानंतर बस रस्त्यावरून घसरून उलटली.
या अपघातात यदम्मा, पद्मम्मा आणि प्रमिला या तीन महिलांचा मृत्यू झाल्याची माहिती समोर आली आहे. तर चौथ्या मृत महिलेची ओळख अद्याप पटलेली नाही. अपघाताची तीव्रता एवढी होती की, बसमधील काही प्रवासी वाहनात अडकले होते. अपघाताचा आवाज ऐकताच स्थानिक नागरिकांनी घटनास्थळी धाव घेतली आणि जखमी प्रवाशांना बसमधून बाहेर काढण्यासाठी मदत केली.
दरम्यान, घटनेची माहिती मिळताच पोलीस आणि बचाव पथक घटनास्थळी दाखल झाले. जखमींना तातडीने जवळच्या रुग्णालयात उपचारासाठी दाखल करण्यात आले. सुमारे सात प्रवाशांना गंभीर दुखापत झाल्याचे प्राथमिक माहितीतून समोर आले आहे. या दुर्घटनेनंतर अनंतगिरी घाट परिसरात काही काळ भीतीचे वातावरण निर्माण झाले होते. पोलिसांनी घटनास्थळी पंचनामा करून अपघाताचा तपास सुरू केला आहे.
