भुसावळ, लोकशाही न्यूज नेटवर्क
शहरातील यशवंत कॉलनी परिसरात भरदिवसा घरफोडीची एक धक्कादायक घटना समोर आली आहे. चोरट्यांनी संधी साधत बंद घराचा कडी-कोयंडा तोडून लाखो रुपयांचा मुद्देमाल लंपास केल्याने परिसरात खळबळ उडाली आहे. या घटनेमुळे नागरिकांमध्ये भीतीचे वातावरण पसरले असून सुरक्षिततेचा प्रश्न पुन्हा एकदा ऐरणीवर आला आहे.
भुसावळ शहरातील यशवंत कॉलनी परिसरात शोभा सुधाकर जयकारे (वय 45) ह्या महिला आपल्या परिवारासह वास्तव्याला आहेत. 16 एप्रिल रोजी सकाळी 9 ते दुपारी 12 या वेळेत अज्ञात चोरट्यांनी त्यांच्यास घराच्या मुख्य दरवाजाची कडी तोडून आत प्रवेश केला. त्यानंतर बेधडकपणे घरातील कपाटाचे लॉकर तोडून त्यातील सोन्या-चांदीचे दागिने आणि रोख रक्कम लंपास केली. चोरट्यांनी केलेल्या या हातसफाईत तब्बल 1 लाख 12 हजार 653 रुपयांचा ऐवज चोरीला गेला आहे. यात सोन्याच्या अंगठ्या, कानातले दागिने, लहान चिपा आणि चांदीचे दागिने तसेच रोख रकमेचा समावेश आहे. घरी परतल्यानंतर शोभा जयकारे यांना चोरी झाल्याचे लक्षात आले. त्यानंतर त्यांनी त्वरित भुसावळ बाजारपेठ पोलीस ठाण्यात धाव घेऊन तक्रार दाखल केली. पोलीसांनी घटनास्थळी येवून पंचनामा केला. महिलेने दिलेल्या फिर्यादीवरून भुसावळ बाजारपेठ पोलीस ठाण्यात गुन्हा दाखल करण्यात आला.
