बुलढाणा जिल्ह्यातील 21 गावात हर घर टंचाई !

बुलढाणा, लोकशाही न्यूज नेटवर्क 

जल जीवन मिशनअंतर्गत ‘हर घर नल’ ही योजना राबविण्यात येत आहे. अजूनही प्रत्येक घरांपर्यंत नळ पोहोचले नाहीत. पाणीपुरवठा करणाऱ्या पाइपलाइन अर्धवट रखडल्या आहेत. कुठे निधी तर कुठे कामाचे नियोजन नाही. काही ठिकाणी निकृष्ट कामे होत असल्याची ओरड वाढल्याने बुलढाणा जिल्ह्यातील घाटावरील पाच तालुक्यांतील 21 गावांमध्ये ‘हर घर’ पाणीटंचाईचे चित्र आहे. या गावांना टँकरद्वारे पाणीपुरवठा केला जात आहे. उन्हाची दाहकता वाढताच स्थिती अधिक बिकट होणार असल्याचा धोका व्यक्त होत आहे.

बुलढाणा जिल्ह्याचा घाटावर आणि घाटाखाली असा विस्तार आहे. घाटावरील मेहकर, बुलढाणा, देऊळगाव राजा, चिखली आणि सिंदखेड राजा या पाच तालुक्यांमध्ये उन्हाळ्यात नेहमीच पाणीटंचाई उद्भवते. या पाणीटंचाईवर मात करण्यासाठी 23 टँकरद्वारे 49 हजार 271 लोकांची तहान भागविली जात आहे. तालुकानिहाय विचार करता मेहकर तालुक्यात पार्डी, जवळा, हिवरा साबळे, वरवंड, बोथा, उटी, पाथर्डी, बुलढाणा तालुक्यातील पिंपळगाव सराई, सैलानी, ढासाळवाडी, पिंपरखेड, चौथा, देऊळगाव राजा तालुक्यातील अंढेरा, निमखेड, कुंभारी, सावखेड नागरे. चिखली तालुक्यातील भालगाव, श्रीकृष्णनगर, कोलारा आणि सिंदखेड राजा तालुक्यातील सावरगाव माळ व पांग्री उगले या गावांमध्ये टँकर धावत आहेत. घाटाखाली नळ योजनांमुळे फारशी दाहकता दिसून येत नाही. जळगाव-जामोद तालुक्यात 140 गाव पाणीपुरवठा योजनेमुळे पाणीप्रश्न निकाली निघाला आहे. काही अपवादात्मक ठिकाणी लोक विहिरींवरून पाणी आणताना दिसतात. शेगाव, खामगाव, मलकापूर, नांदुरा या भागातही तीव्र पाणीटंचाई नसल्याचे सांगण्यात येते.

133 विहिरी अधिग्रहित

घाटावरील लोणार आणि घाटाखालील मोताळा, मलकापूर, नांदुरा, जळगाव-जामोद, संग्रामपूर, शेगाव, खामगाव या तालुक्यांमध्ये सध्या तरी टँकरची परिस्थिती नसल्याचे सरकारी आकडेवारी सांगते. देऊळगाव राजा, शेगाव, लोणार, मेहकर, बुलढाणा, सिंदखेड राजा, चिखली, मलकापूर या तालुक्यांमधील 119 गावांमध्ये 133 विहिरींचे अधिग्रहण केले आहे. घाटाखालील तालुक्यांमध्ये नळ योजना कार्यान्वित झाल्याने टँकरने पाणीपुरवठा करण्याची सध्या तरी वेळ आली नाही.