ऐश्वर्या–अभिषेकची यूट्यूबविरुद्ध कोर्टात धाव
एआय-जनरेटेड डीपफेक व्हिडिओंवर बंदी व ४ कोटींची भरपाईची मागणी
नवी दिल्ली लोकशाही न्यूज नेटवर्क
बॉलीवूडमधील चर्चित जोडपे अभिषेक बच्चन आणि ऐश्वर्या राय बच्चन यांनी त्यांच्या वैयक्तिक हक्कांचे रक्षण करण्यासाठी पुन्हा एकदा न्यायालयाची धाव घेतली आहे. यावेळी त्यांनी यूट्यूब आणि त्याची मूळ कंपनी गुगलविरुद्ध ₹४ कोटींच्या भरपाईचा दावा दाखल केला आहे.
६ सप्टेंबर रोजी दाखल झालेल्या या याचिकेत, डीपफेक एआय-जनरेटेड व्हिडिओ त्वरित हटवावेत, तसेच पुन्हा अपलोड होण्यापासून रोखावेत, अशी मागणी करण्यात आली आहे. बच्चन दांपत्याने न्यायालयाला कळवले की, अशा व्हिडिओंमुळे त्यांच्या प्रतिमेला धक्का पोहोचत असून एआयच्या गैरवापरावर आळा घालणे आवश्यक आहे.
“एआय बॉलीवूड इश्क” चॅनेलवर थेट कारवाईची मागणी
याचिकेत विशेषतः ‘AI Bollywood Ishq’ या यूट्यूब चॅनेलचा उल्लेख आहे. या चॅनेलवर तब्बल २५९ पेक्षा जास्त बनावट एआय व्हिडिओ अपलोड करण्यात आले असून, त्यांना १.६५ कोटींपेक्षा अधिक व्ह्यूज मिळाले आहेत. या व्हिडिओंपैकी एका क्लिपमध्ये ऐश्वर्या राय आणि सलमान खान स्विमिंग पूलमध्ये असल्याचे दाखवले गेले आहे. याच कारणास्तव जोडप्याने मानहानी म्हणून ₹४ कोटींची भरपाई मागितली आहे.
बच्चन कुटुंबाचे म्हणणे आहे की, यूट्यूबने एआय तंत्रज्ञानाचा गैरवापर टाळण्यासाठी तातडीने सुरक्षा उपाययोजना राबवाव्यात आणि त्यांच्या नावे, प्रतिमा व आवाज कोणत्याही एआय मॉडेलच्या प्रशिक्षणासाठी वापरले जाऊ नयेत.
याआधीही अभिषेक आणि ऐश्वर्याने अशाच प्रकारच्या बनावट कंटेंटविरुद्ध न्यायालयात याचिका दाखल केली होती. दरम्यान, या जोडप्याच्या वैवाहिक आयुष्याविषयी सतत चर्चा रंगत असतात, मात्र खोट्या अफवांनी त्रस्त झाल्याचे अभिषेकने मुलाखतीत स्पष्ट केले होते.
