भुसावळ, लोकशाही न्यूज नेटवर्क
भुसावळ रेल्वे स्थानकावर एका अनोळखी तरुणाचा मृतदेह आढळून आल्याने त्याची ओळख पटविण्यासाठी रेल्वे पोलिसांनी नागरिकांना पुढे येण्याचे आवाहन केले आहे.
लोहमार्ग पोलीस ठाणे भुसावळ येथील तपासी अंमलदार एएसआय/१७४ श्याम मंगेश बोरसे यांनी दिलेल्या माहितीनुसार, दि. ५ जुलै २०२६ रोजी ऑन ड्युटी स्टेशन प्रबंधक, भुसावळ रेल्वे स्थानक यांनी लेखी मेमोद्वारे ट्रेन क्रमांक १९००६ अप च्या एस-५/६ कोचमध्ये एका अनोळखी इसमाचा मृतदेह असल्याची माहिती दिली. त्यानंतर संबंधित मृतदेह भुसावळ रेल्वे स्थानकाच्या प्लॅटफॉर्म क्रमांक १ वरील के.एम. क्रमांक PF-01/14 जवळ उतरविण्यात आला. रेल्वेचे डॉ. आदित्य यांनी तपासणी करून संबंधितास मृत घोषित केले.
या घटनेप्रकरणी लोहमार्ग पोलीस ठाणे भुसावळ येथे अकस्मात मृत्यू क्रमांक ७१/२०२६ भारतीय नागरिक सुरक्षा संहिता (बीएनएसएस) कलम १९४ अन्वये नोंद करण्यात आली असून, मृत व्यक्ती बेवारस असल्याने त्याची ओळख पटविण्याचे प्रयत्न सुरू आहेत.
मृत इसमाचे वय अंदाजे २८ वर्षे असून रंग सावळा, चेहरा लांबट, शरीरयष्टी बारीक आहे. डोक्यावर काळे, मोठे व साधूसारखे वाढलेले केस, काळी बारीक मिशी आणि काळी साधूसारखी वाढलेली दाढी आहे. नाक सरळ असून डोळे बारीक आहेत. त्याच्या अंगात पांढऱ्या रंगाचा लाईनिंग असलेला मळकट काळपट फुलबाहींचा शर्ट व राखाडी रंगाची मळकट काळपट फुल पँट होती. कपड्यांवर कोणताही टेलर मार्क आढळून आलेला नाही.
सदर व्यक्तीची ओळख कोणाला पटत असल्यास किंवा त्याच्या नाव, गाव, पत्ता अथवा वारसांबाबत माहिती असल्यास लोहमार्ग पोलीस ठाणे भुसावळ येथील तपासी अंमलदार एएसआय/१७४ श्याम मंगेश बोरसे यांच्याशी मो. ९८२३७८८४९९ वर संपर्क साधण्याचे आवाहन रेल्वे पोलिसांनी केले आहे. या अकस्मात मृत्यू प्रकरणाचा पुढील तपास प्रभारी अधिकारी धायरकर यांच्या मार्गदर्शनाखाली एएसआय श्याम मंगेश बोरसे करीत आहेत.
