जामठी आठवडे बाजारात दोन गटांत हाणामारी; चार जणांविरोधात गुन्हा
बोदवड लोकशाही न्यूज नेटवर्ज
तालुक्यातील जामठी येथील आठवडे बाजारात शनिवारी दोन गटांमध्ये जबर हाणामारी झाली. या प्रकरणी बोदवड पोलिसांनी चार जणांविरोधात गुन्हा दाखल केला आहे.
घटनेची माहिती अशी की, मार्केट यार्डमध्ये गुरांचा बाजार चालू असताना शेळ्यांची वसुली पावती न फाडल्याच्या किरकोळ वादातून मार्केट कमिटीच्या कर्मचाऱ्यासोबत हुज्जत घालण्यात आली. यावेळी जामठीतील युवक अजय उत्तम पाटील हा भांडण सोडवण्यासाठी गेला असता, खुर्द बेटावद येथील चार युवकांनी त्याच्या डोक्यात लोखंडी रॉडने मारहाण केली, तर इतर तिघांनी काठीने मारहाण करून जखमी केले.
जखमी अजयला बोदवड रुग्णालयात प्राथमिक उपचारासाठी दाखल करण्यात आले, नंतर त्यांना जिल्हा रुग्णालयात पाठवण्यात आले. स्थानिक व्यापाऱ्यांनी या खुर्द बेटावद येथील नागरिकांवर महिन्याभरात दोनदा हिंसक वर्तन करून व्यापारावर दहशत निर्माण करण्याचा आरोप केला आहे.
स्थानिक व्यापाऱ्यांनी पोलीस प्रशासनावर या संशयितांवर कठोर कारवाई करण्याची मागणी केली आहे.
