चिमुकल्याचा बळी : दोघे आरोपी ताब्यात

यावल : तालुक्यातील किनगाव शिवारात घडलेल्या एका हृदयद्रावक घटनेने संपूर्ण जिल्हा हादरला आहे. सुरुवातीला अपघात म्हणून नोंद झालेल्या प्रकरणाला पोलिसांच्या सखोल तपासानंतर धक्कादायक वळण मिळाले असून, साडेतीन वर्षांच्या अंध मुलाची हत्या केल्याप्रकरणी त्याची आजी आणि वडिलांविरुद्ध खुनाचा तसेच आईला ठार मारण्याचा प्रयत्न केल्याचा गुन्हा दाखल करण्यात आला आहे.
दि. 13 जुलै रोजी सकाळी साडेआठच्या सुमारास किनगाव येथील शेतातील विहिरीत 70 टक्के दृष्टिदोष असलेल्या सरस्वती स्वप्निल पाटील (वय 27) आणि त्यांचा साडेतीन वर्षांचा मुलगा कृष्णा पडल्याची घटना घडली होती. या दुर्घटनेत सरस्वती या लाकडी आधाराला धरून बचावल्या, मात्र कृष्णाचा पाण्यात बुडून मृत्यू झाला. सुरुवातीला हा अपघात असल्याचे मानले जात होते. मात्र मुलाच्या अंत्यसंस्कारानंतर पोलिसांनी रात्री उशिरापर्यंत केलेल्या चौकशीत सरस्वती यांनी धक्कादायक माहिती दिली. त्यांच्या तक्रारीनुसार, विहिरीच्या पूजेसाठी गेले असताना सासू आशाबाई पाटील यांनी त्यांना आणि मुलाला विहिरीत ढकलले. या कृत्यात पती स्वप्निल पाटील याचाही सहभाग असल्याचा आरोप त्यांनी केला आहे. तपासात समोर आलेल्या माहितीनुसार, फिर्यादी आणि त्यांचे पती दोघेही दृष्टिहीन असून, जन्माला येणारे अपत्यही अंध असल्याचे डॉक्टरांनी गर्भावस्थेत सांगितले होते. त्यावेळी गर्भपात करण्याचा आग्रह करण्यात आला होता. मात्र फिर्यादीने मुलाला जन्म दिल्यानंतर कौटुंबिक वाद वाढल्याचे तक्रारीत नमूद करण्यात आले आहे. या प्रकरणी यावल पोलीस ठाण्यात गुन्हा दाखल करण्यात आला असून, दोन्ही आरोपींना पोलिसांनी ताब्यात घेतले आहे. पुढील तपास यावल पोलीस करीत आहेत.