मुंबई, लोकशाही न्यूज नेटवर्क
बिग बॉस मराठी सिजन ४ (Bigg Boss Marathi Season 4)चा ग्रँड फिनाले नुकताच धुमधडाक्यात पार पडला असून, अक्षय केळकरने (Akshay Kelkar) हा सिजन आपल्या नावे केला आहे. त्याला बक्षीस म्हणून १५ लाख ५५ हजार रुपये मिळाले. असून स्पॉन्सर्सकडून सोन्याची चैन आणि बेस्ट कॅप्टन ठरल्यामुळे पाच लाख रुपये मिळाले, अंतिम फेरीत त्याची सहस्पर्धक अपूर्व नेमळेकर(Apoorva Nemalekar) ही दुसऱ्या क्रमांकावर राहिली तर अक्षयने बिगबॉस सीजन ४ जिंकला आहे.
स्पर्धेत अभिनेते किरण माने हे सुद्धा अंतिम फेरीत तिसऱ्या क्रमांकावर होते. टॉप 5 स्पर्धकांमध्ये अक्षय केळकर, अपूर्वा नेमळेकर, किरण माने, अमृता धोंगडे आणि राखी सावंत यांचा समावेश होता. त्यापैकी अमृताला घराबाहेर पडावं लागलं आणि राखीने 9 लाख रुपये स्वीकारून घराबाहेर पडण्याचा निर्णय घेतला. बिग बॉस मराठीच्या या सिझनमध्ये स्पर्धक 100 दिवस घरातील कॅमेऱ्यांच्या नजर कैदेत होते.
बिग बॉसच्या घरात सुरुवातीपासूनच तो तगडा स्पर्धक मानला जात होता. तीन महिन्यांपूर्वी तो बिग बॉसच्या घरात सर्वांत लोकप्रिय स्पर्धक म्हणून सहभागी झाला. घरातील स्पर्धकांसोबतच्या भांडणांमुळे आणि त्याच्या वक्तव्यांमुळे तो कायम चर्चेत राहिला. अक्षय या शोचा ‘अँग्री यंग मॅन’ (“Angry Young Man”) म्हणूनही ओळखला जातो. विशेष म्हणजे या संपूर्ण सिझनमध्ये सूत्रसंचालक महेश मांजरेकर (Mahesh Manjrekar) यांनी अक्षयचीच सर्वाधिक शाळा घेतली होती. घरातील इतर स्पर्धकांसोबत हाणामारी केल्यामुळे तो चर्चेत असायचा. खेळाडूवृत्ती, प्रत्येक टास्कमधील मेहनत, स्पष्टवक्तेपणा यामुळे तो नेहमीच चर्चेत राहिला.
