चांदी तब्बल 8700 रुपयांनी स्वस्त : ग्राहकांना दिलासा
मुंबर्इ
सोन्या-चांदीच्या किमतीत शुक्रवार दि. 15 मे रोजी मोठी घसरण पाहायला मिळाली. मल्टी कमोडिटी एक्सचेंजवर सोने आणि चांदीच्या दरात झालेल्या या घसरणीमुळे ग्राहक आणि गुंतवणूकदारांसाठी खरेदीची मोठी संधी निर्माण झाली आहे. विशेष म्हणजे चांदीच्या दरात तब्बल 8 हजार 790 रुपयांची घसरण झाली आहे.
मल्टी कमोडिटी एक्सचेंजवर 5 जून 2026 एक्सपायरी असलेला गोल्ड फ्युचर्स वायदा व्यवहार सुमारे 1,425 रुपयांच्या घसरणीसह व्यवहार करत होता. सोने 1,60,790 रुपये प्रति 10 ग्रॅम दराने उघडले होते. मागील सत्रात सोन्याचा भाव 1,61,978 रुपयांवर बंद झाला होता. सकाळी सुमारे 9:55 वाजेपर्यंत सोन्याचा वायदा 0.88 टक्क्यांच्या घसरणीसह 1,60,553 रुपये प्रति 10 ग्रॅम दराने व्यवहार करत होता. सुरुवातीच्या व्यवहारात सोन्याने 1,60,992 रुपयांचा उच्चांक गाठला होता. मल्टी कमोडिटी एक्सचेंजवर 3 जुलै 2026 एक्सपायरी असलेल्या चांदीच्या वायद्यात 3.02 टक्के म्हणजेच तब्बल 8,790 रुपयांची घसरण झाली. चांदीचा व्यवहार 2,80,000 रुपयांवर सुरू झाला होता. दिवसातील व्यवहारादरम्यान चांदीने 2,83,219 रुपयांचा उच्चांक गाठला. दिल्ली, मुंबई आणि कोलकाता येथे 10 ग्रॅम चांदीचा दर 2,900 रुपये आहे. तर 100 ग्रॅम चांदी खरेदीसाठी ग्राहकांना 29,000 रुपये मोजावे लागणार आहेत. चेन्नईमध्ये 10 ग्रॅम चांदीचा भाव 3,050 रुपये आहे.
