भुसावळ | भुसावळ नगरपालिकेच्या नगराध्यक्षा गायत्री चेतन भंगाळे यांचे जात प्रमाणपत्र अवैध ठरविण्याचा महत्त्वपूर्ण निर्णय जळगाव येथील जात पडताळणी समितीने दिला आहे. या निर्णयामुळे स्थानिक राजकारणात मोठी खळबळ उडाली आहे.
भुसावळ नगरपालिकेतील नगराध्यक्षपद अनुसूचित जाती प्रवर्गातील महिलांसाठी राखीव होते. या निवडणुकीत राष्ट्रवादी काँग्रेस (शरद पवार गट) यांच्या वतीने गायत्री भंगाळे यांनी भारतीय जनता पक्षाच्या उमेदवार रजनी सावकारे यांचा पराभव करून विजय मिळवला होता. उमेदवारी अर्जासोबत त्यांनी एस.सी. प्रवर्गाचे प्रमाणपत्र सादर केले होते, जे भुसावळच्या प्रांताधिकाऱ्यांकडून जारी करण्यात आले होते. नियमानुसार निवडणुकीनंतर सहा महिन्यांच्या आत जात वैधता प्रमाणपत्र सादर करणे आवश्यक असते. मात्र, ही मुदत पूर्ण होण्यापूर्वीच पडताळणी समितीने त्यांचे प्रमाणपत्र अवैध ठरविले आहे. समितीच्या अध्यक्षा नयना बोदर्डे तसेच सदस्य एन. एस. रावते आणि एस. एस. महाजन यांच्या समितीने सादर कागदपत्रांची तपासणी करून भंगाळे या अनुसूचित जाती प्रवर्गात येत नसल्याचे नमूद केले. प्रमोद सावकारे, रजनी सावकारे, संजय तायडे आणि राहुल तायडे यांच्या तक्रारीनंतर ही कारवाई करण्यात आली आहे. याशिवाय, संबंधित प्रकरणात भुसावळच्या प्रांताधिकाऱ्यांवरही कारवाईचा प्रस्ताव देण्यात आला आहे. या निर्णयामुळे गायत्री भंगाळे यांच्या नगराध्यक्षपदावर अपात्रतेची टांगती तलवार निर्माण झाली असून, पुढील कायदेशीर घडामोडींवर सर्वांचे लक्ष लागले आहे.
