नशिराबाद पोलिसांच्या तपासाला यश
जळगाव (प्रतिनिधी) : तब्बल दोन महिने बेपत्ता झालेल्या भुसावळ येथील १८ वर्षीय जय संजयकुमार जावरे या तरुणाचा शोध नशिराबाद पोलिसांनी सायबर पोलिसांच्या मदतीने ओडिशातील जगन्नाथ पुरी येथे लावला. अखेर जय याला सुखरूप जळगावला आणून पालकांच्या स्वाधीन करण्यात आले. पोलिसांच्या या कामगिरीबद्दल जिल्हा पोलीस अधीक्षक महेश्वर रेड्डी, अपर पोलीस अधीक्षक अशोक नखाते व उपविभागीय अधिकारी संदीप गावीत यांनी तपासपथकाचे कौतुक केले.
जय जावरे हा १७ जुलै रोजी घरातून न सांगता निघून गेला होता. त्याचा मोबाईल बंद असल्याने ठावठिकाणा लागत नव्हता. १८ जुलै रोजी नशिराबाद पोलिस ठाण्यात मिसिंगची नोंद झाली होती. सहा. पोलीस निरीक्षक ए. सी. मनोरे यांच्या मार्गदर्शनाखालील तपास पथकाने बँक व्यवहार तपासले असता तो जगन्नाथ पुरी येथे असल्याचे लक्षात आले.
यानंतर सायबर पोलीस स्टेशनच्या अंमलदारांनी तांत्रिक माहितीचे विश्लेषण करून ठिकाणा निश्चित केला. तपास पथकाने दोन दिवस प्रयत्न करून जयला शोधले आणि २० सप्टेंबर रोजी पालकांच्या स्वाधीन केले. या प्रयत्नामुळे कुटुंबाला दिलासा मिळाला असून संपूर्ण घटनेचे पोलिस अधीक्षकांकडून कौतुक करण्यात आले.
